-Pynpaw jingsngewnguh ki paidbah nongshong shnong-
Ka Shnong Nongrim Bambthong kaba hap hapoh ka Thadlaskeiñ Block, West Jaiñtia Hills District kaba dei kawei na ki shnong kaba sahdien bha ha kiba bun ki liang ha ki por mynshwa bad ki nongshong shnong jong ka, ki im tang da ka kam rep, kum ka jingrep Shynrai, u Synsar bad ki katto kane ki jait jhur.
Hynrei mynta ka kynti kane ka shnong (Nongrim Bambthong) kala ïoh syndon da u surok rong (psiang) ba thymmai ha baroh 4 tylli ki dong kiba hap hapoh katei ka shnong bad kane kala pynsuk ïa ki nongshong shnong ha ka kit ka bah, ka leit ka wan bad ka la wanrah ka jingkylla ba bun hapoh kane ka shnong.
Ka jingïoh surok rong jong ka shnong ka dei lyngba ka jingtreishitom jong u MLA ka thaiñ u ma Sniawbhalang Dhar, uba bat mynta kum u Symbud Myntri Rangbah ka jylla. Na ka liang kitei ki nongshong shnong ki khlem da lah ban ai ka jingïaroh bas hi katdei eh ïa ki kam ba bha kiba u MLA jong ka 1-Nartiang Constituency ula leh na ka bynta jong ki.
U Waheh Shnong jong ka shnong Nongrim Bambthong ma Bisharbha Khynriam ula ong ha ki por jong ka kmie bad u kpa jong u, mynshwa ki im ha ka jingjynjar khamtam ha ka kit ka bah na ka daw ka jingbym don ïa u surok ba biang hynrei naduh ba u ma Sniawbhalang ula wan ïakhun ïa ka Election MLA 2013 kala don ka jingïateh soskular bad ka shnong ban ai ka jingkyrshan ïa u bad hadien ka jingjop ula pyni shisha ïala ka jingkular da kaba ïarap ban pyntrei ïa u surok Main road bad kane ka la urlong.
Ym tang ïa kitei ki surok rong ba dang thymmai hapoh kitei ki 4 tylli ki dong ka Nongrim Bambthong, hynrei u MLA u la ïarap kumjuh ïa ka shnong naduh ki Community Hall, ki tin sopïing, ki umbam umdih nalor kiwei kiwei de ki jingpynroi pynpar.
Ka jingïoh ïa une u surok rong hapoh ka shnong ka long ka kabu ksiar ïa ka shnong ban lait na ki jingsaja na um ktieh bad ka jingpang met haka leit ka wan, kumjuh ruh da ka jingdon u surok ba ïaid lyngba ka shnong kala ïarap ïa ki saw tylli kiwei pat ki shnong ba marjan kita ka Umladang, Umbluh, Laru, Mookbu ban pynsuk ha ka leit ka wan.
U ma Bisharbha ula ong ka shnong ka don kumba 200 tylli ki longïing, ka jingdonbriew kumba 11 spah tam, na ka liang ki skul ki don lai tylli ki SSA, Govt LP kawei bad kawei ka skul kaba la seng mynshwa da ka seng jong ka shnong bad la shimti mynta da ka District Council.
Ula ong kumba long mynta ka shnong ka ai ka jingshaniah ïa kane ka sorkar MDA-2 ba mynta kaba la ïarap shibun eh ïa ka shnong bad kaba ïohi jngai ïa ka jingeh jong ka shnong bad ïa ka jylla hi baroh kawei wat lada don shibun ki jingshah kynnoh na ki katto katne.
Kiba bun na ki nongshong shnong kila pynpaw ka jingsngewkmen haba kila ïoh ïa kane ka surok hadien ki 5 ngut ki MLA ba mynshwa ki bym shym la leh ei ei, hynrei ynda la wan uba hynriew (6) u ma Sniawbhalang Dhar kala long ka jingkyrkhu kaba khraw eh ïa ka shnong bad ka thaiñ hi baroh kawei.
Kawei ka longkmie kala ong mynshwa kat ba ym pat poi u MLA Dhar ka shnong ka don hapdeng ka ktieh, hynrei mynta kala pher lut nadong shadong da ki kam ba bha jong u, wat haduh ka por leit tep briew kala pynsuk ïa ki ban poi haduh ka jaka ba tep briew.
La pynsngew ba ki don ki dong kiba don tang kumba 3 ne 4 ïing kila ïoh surok rong bad ka long ka jingdonbok kaba khraw eh ïa ki kum ka shnong, ka jingwan u MLA kala long kum ka jingwan kit wan bah ïa ka shnong na ka jingïam briew ha ki por mynshwa bad mynta kala wan ka jingphyrnai la ong ki nongshong shnong.
Uwei na ki riew rangbah ka shnong ula ong la 50 snem tam mynshwa ngi don haka jingsngewkthang ban pynkit ïa ki mar shaduh Nartiang hynrei la wan shisha ka jingkylla mynta, namar ‘la trei kham jam ka kam bad ïa ka ktien’ ong uwei na ki riew rangbah ka shnong u ma Shiak War uba don 75 snem ka rta.
