Hapdeng ka jingiaid jong ka jingtyrwa jong ka Israel sha ka kynhun lehnoh Hamas ban sangeh ka jinghiar thma ia ka nongbah Rafah jong ka Gaza, hynrei na ka liang ki shipai ki dang pdeng hi ia ka jinghiar thma ia ka Rafah da kaba ther bomb ia katei ka nongbah, kane imat ka dei na ka jingslem jong ka Hamas ban ai ia ka jubab sha ka Israel.
Ka jingther bomb kaba jia hynnin ka sngi ka la wan rah ia ka jingiap jong ki 27 ngut ki briew bad na kine 10 ngut ki dei ki khynnah rit.
U nongaiktien jong ka Hamas u Khalil al – Hayya ula ong ba ka Hamas ka dang don hapdeng ka jingpeit bniah ia ka jingtyrwa jong ka ri Irael, ha kaba u Myntri bar-ri ka Israel ula ong ba ka jinghiar thma ia ka Rafah kan sangeh noh lada ka Palestine (Hamas) kan pyllait noh ia ki briew jong ka Israel kiba la shah bat koidi haduh mynta.
Kumba long haduh mynta kila don haduh 34,388 ngut ki nong Palestine kiba la duh noh ia la ka jingim ha kane ka thma bad 77,437 ngut kila mynsaw naduh ba la sdang ka jinghiar thma ka Israel ia ka Gaza ha ka 7 tarik u October 2023. Katba na ka liang jong ki nong Israel pat kiba la khlad noh na ka jingther jong ka Gaza ki don 1139 ngut bad da ki phew phew ngut mynta ki dang don ha ka jingshah rahbor sha Gaza.
