Ka jylla Meghalaya ka la buh ia ka 29th April, 2024 kum ka sngi ba ki khynnah skul kin wan sha ki skul jong ki khlem ki plakot ne kata ka ‘Bagless’ khnang ba kin ioh ban iashim bynta ha kaba thung jingthung ha ki kper ia kaba la tip kum ki ‘School Nutrition (Kitchen) Garden Day’, da ka jingthmu ba kine ki kper kin pynioh jingmyntoi ha kaba ai bam ja sngi ia ki khynnah skul ne ka PM-POSHAN. Ia kane ka prokram la leh ha kylleng ki skul jong ka jylla.
Mynta ka sngi la sakhi ruh ia ki khynnah skul jong ka Khim-U-Sniang Govt, L.P. School, Jowai (KGLPS) ha ryngkat ka jingiatreilang bad ki nonghikai kumjuh ki cooks kila iashim bynta shongshit ban shna ia kine ki kper bad ban thung ia ki jait jingthung ba bun jait.
Watla kane ka skul kam don satia ia ka jaka thung kaba heh, hynrei kila pyni ia ka nuksa da kaba pynlong ia ka sawdong jingker kynroh bad kumjuh ruh da kaba pyndonkam ia ki sder buh dohkha (Thermocol), ban thung ia ki jait jhur tei met bapher bapher. Ha kane ka sngi ki khynnah skul kila wanrah ruh nalade ia ki symbai jhur bapher, kum u Rymbai, Sohkhia, Maradoh, Pathaw, Jyllang, Tyrso bad kiwei. Kane ka long katkum ka kyrwoh ba la phah da ki bor pyniaid jong ka skul.
