Ki Pulit jong ka East Jaiñtia Hills District kila ioh biang ban kurup ia u drug Heroin uba shongdor haduh Rs.2.1 Klur tyngka ha ryngkat ki dawai Nitrazepam Tablets kiba don haduh 3720 tylli ha ka jingkhynra kali kaba la pynlong hynnin ka sngi (30/04/2024) ha Ratacherra Infiltration Check Post.
Ha ka jingkhynra kali jong ki Pulit ha ka por kumba 10:00 PM kila bat ia ka wei ka Bus Night Super jong ka MTC kaba don ia u Registration No. ML-03-0216. Haba pynlong ia ka jingkhynra ki Pulit kila lap ia ki mar ba la kit beaiñ na uwei u briew ba la tip kyrteng u Mizazur Rahman Barbuiya, khun jong u Mabasil Ali Barbuiya, na ka shnong Kachudaram Part-II kaba hap hapoh ka Sonai Silchar jong ka Cachar District, Assam.
Na une u briew ki Pulit kila ioh ban kurup ia u drugs Heroin ia uba la thep ha ki 25 tylli ki synduk sabon, bad haba la kheiñ ia ka dor iew jong une u drugs ula kynjoh sha ka Rs.2.1 klur tyngka. Nalor kine ki Pulit kila kurup ruh na u ia ki 3720 tylli ki dawai Nitrazepam (Tablets) bad kawei ka Mobile Phone.
Ki Pulit kila pynngat case ia utei u Mizazur Rahman Barbuiya ha ka kyndon aiñ NDPS bad ka jingtohkit ia u ka dang iaid shakhmat. Ki Pulit ka EJH lyngba u Superintendent of Police, kila pynpaw ba ka jingiai aimynsiem jong u Myntri Rangbah ka Jylla bad ruh da ka jingkyrshan jong u Director General of Police ka jylla kila lah ban nang iai trei shitom shuh shuh bad kane ka jingiohkem kaba hynnin ka sngi ka dei sa kawei pat ka jingiohkem kaba ar na ka jingbun jong u drugs hapoh kine ki 3 sngi.