Mynta ka sngi ka Federation of Khasi Jaiñtia and Garo People (FKJGP), East Jaiñtia Hills District hapoh ka jingialam jong u President ma Deihok Sumer bad General Secretary ma Emlang Sutnga kila ioh ban leit ia kynduh ia u DC ka East Jaiñtia Hills District u A. Baranwal, IAS ban dawa shimkhia halor ka jingsuki ka jingtreikam ki tnat sorkar hapoh ka District.
Na ka liang ka FKJGP kala buh da ka jingthoh ha khmat utei u khlieh ka District ban pynkloi ia ka jingdonkam ki paid nongshong shnong ka District. Katkum ka jinglap jong ka Seng la iathuh ba ka la don ka jingsuki palat ka jingpynioh ia ki Scheduled Tribe Certificate sha ki nongshong shnong kiba donkam ia kine ki kot ki sla. Kane ka la wanrah jingeh khamtam ha kaba iadei kam bad ki skul, ki banks, ha ki jaka trei bad ha kiwei de ki bynta.
Ka jingsuki ban pynioh ia ki Certificate kiba iadei bad ka jingseng ia ki Society bapher bapher, tang na ka jingbymdon jong ki ophisar kiba dei peit ia kane. Ka seng ka pynpaw ba kumba long mynta ym don Sub-Registrar lane Registrar ban pyndep ia ka kam kaba iadei bad ka jingpynioh Certificate ia kino kino ki kynhun kiba donkam ban thaw ia ki Society hapoh ka District.
Sa kawei ka dei ka jingsuki jong ka tnat ban pynioh ia ki Certificate lane ki License na ka bynta kito ki nongshong shnong kiba donkam ban aplai na ka bynta ki tiar siat (Suloi). Ki nongshong shnong kiba aplai ia kine ki kot ki hap ban ap da ki snem ki snem ban ioh ia ki. Kane ka la buh jingeh bha ia ki nongshong shnong wat tang ban transfer ia ki kyrteng na wei sha wei ruh.
Kumta ka Seng ka buh ka jingkyntu ia u DC ba un shim khia bad leh kloi ia kaba donkam khnang ba ki nongshong shnong kin suk ha kine ki liang baroh.
