Ka Khasi Students’ Union (KSU) Lumshnong Unit bad Narpuh Circle ka pynpaw ia ka jingbynñiaw halor ka jingduh bording (Light) hapoh ka shnong Lumshnong bad ka thaiñ Narpuh hi baroh kawei naduh mynshi sngi kata ka long naduh ka 29 tarik April 2024 haduh mynta ka sngi 1 tarik May 2024.
Ka seng kam tip shuh tip sa katno sngi kan shimpor ban ioh light. Hooid ym lah ban len namar ka jingther u slap, ka jingkhie ka ‘er ïong, ka jingkhyllem ki dieng bad hap halor ki sainar dei ioh lehse na kata ka daw. Hynrei ha kawei pat ka liang haba jia kum kine ki jait case ne aksident halor ka jingpynthut ki bor mariang ki bor ba dei khmih ki dei ban pynkloi ia ka jingmaramot, pynban la lap ba ka tnat bording ka leh bymsuidñiew bad suki palat.
Ki jaka ba iaid ki tyllIai sainar kim juh khuid namar ka duna palat ki nongtrei ne ki lineman. Kane kam dei ka sien nyngkong ba thut bording, hynrei lah ban ong ha baroh 12 bnai hi, namar ym don nongmih khmat ban peit ia kane ka jingeh. Ka aïom lyiur ka dang shu sdang, tip sa katno shuh ka jingiai bteng ka jinglip light.
Mynta ka sngi 1/05/2024 na ka liang ki dkhot ka KSU Lumshnong Unit ki la leit ha Sub-Station Lumshnong ban kylli halor ka jingbymioh bording, te na ka liang ki bor ba dei peit ki iathuh ba ka jinglip light ka long ha baroh shi lynter namar ka jingsniew noh u tiar machine ne u dish.
Haba kylli, la ioh jingtip ruh ba ym don tiar ban shna ia uta u dish jong kata ka machine namar hap ban rah na Khliehriat, ban shu tan da ki kti ruh ym long. Ka jingkylli ka long haba kat ka Sub-Station hato ym lah mo ban pynbiang tiar ban shna haba don ka jingthut light.
Na ka liang ka seng ka pynrem ia ka jingtrei torti bad jingsuki ka rukom trei kine ki nongtrei bording. Shapoh thaiñ Narpuh hi ka long kumne barabor namar ym don ba peit ba khmih. Hynrei haba phai sha ka Bill lait pat ym don jingduna tang khyndiat ruh.