Ha ka step jong ka 2 tarik mynta u bnai ki Pulit jong ka East Jaiñtia kiba pynlong ia ka jingtalasi kali ha Ratacherra OP ha u surok bah NH-6, kila ioh ban kurup ia u drug ba shongdor haduh Rs.1.1 klur tyngka na kawei ka kali kaba don ia u Reg.Number: ML05 X 7741.
Ka khubor Pulit kala iathuh ba ha ka jingtalasi ia kawei ka kali la lap ia ki song kiba la suba jur ba ki dei ki drug bad haba la pynlong ia ka jingjurip bniah ki lap ba ki dei ki drug heroin bad ki don ia ka jingkhia kaba 136 grams, kiba ka dor iew jong ki ka poi haduh Rs.1.1 klur tynga.
Ha kaba iadei bad kane ki Pulit kila kem noh ia ki lai ngut ki briew kiba la donkti ban rah ia kine ki jingdih beaiñ kiba kynthup ia u Tazirul Sheik, uba dei na ka shnong 20 Fersakandi, West Garo Hills uba dei ruh u nongñiah jong katei ka kali, u Binod Baro na Ukhura, Kamrup District, Assam bad u Abdul Mukit na Shiberchak, Badarpur, Karimganj District, Assam.
Ki Pulit kila bat ruh ia katei ka kali bad 3 tylli ki Mobile Phone.