U District Medical & Health Officer ka West Jaintia Hills District u Dr. K.C. Ajar ula pyllait paidbah ban sdang ia ka prokram jong ka Social Awareness and Action to Neutralise Pneumonia Successfully (SAANS) ka ban sdang ban treikam hapoh ka District na ka bynta ban pynduh pyndam ia ka jingpang Pneumonia hapdeng ki khyllung khynnah.
Kane ka dei ka prokram kaba la pyniaid da ka National Health Mission, West Jaintia Hills bad ia kane ka jingialang plie la pynlong ha Lumkyrwiang Urban Primary Health Centre (UPHC) mynta ka sngi.
U Dr. Ajar ha ba kren ha kane ka sngi ula batai shaphang ki dak ki shin jong ka jingpang Pneumonia bad ula kyntu ia ki kmie ki kpa ba lada ki lap ia kino kino ki dak ki shin ha ki khun jong ki kum ka jingshitom ha ka ring bad pynhiar mynsiem, ka jingjyrhoh ne ka jingshitmet, kaba lah ban ialam sha kane ka jingpang ki dei mar mar ban leit sha ki jaka sumar. U la ong ba ka jingiada na kane ka jingpang Pneumonia ha ki khynnah ka long ka daw ba yn lah teh lakam ia ka jingkhlad bym dei por jong ki khynnah.
I Dr. M. Syngkon, District Maternal & Child Health Officer iba dei ruh i District Immunisation Officer ila batai ba ka jingthmu jong kane ka SAANS Campaign ka long ban ai ka jingiada ia ki khyllung khynnah ban lait na ka jingkhlad na ka jingpang Pneumonia bad Diarrhoea bad ka thong ka long na ka bynta kito kiba don ha ka rta kaba 0-5 snem.
Ila batai ia ki lai tylli ki jingthmu jong ka prokram kaba ong “Protect, Prevent bad Treatment” ila ban jur ba ka long kaba donkam haduh katta katta ban ioh ia ka jingsumar kaba biang por lada jia ba ki khynnah ki ioh ia kine ki jait jingpang. Ia ka jingialang la pyniaid da i Additional DMHO, Dr. A Challam bad ia ki kyntien ai khublei da i Dr. R. Passah ba dei peit ia ka Loomkyrwiang UPHC.
