Ka Khasi Students’ Union (KSU) West Jaiñtia Hills Unit bad ka Jaiñtia Students’ Union (JSU) sengkmie, kila phah da ka jingthoh sha u Myntri ka tnad pule puthi jong ka sorkar jylla u Rakkam A Sangma, halor ka jingbym biang ka rukom poi ki jingkylli haka jingïakhun ïa ka NEET Exam ban ïoh leit pule Doctor kaba la long ha 5 tarik u Jymmang ha St. Mary Mazzarello Jowai.
Kitei ki ar seng kila pynpaw ka jingsngewdiaw halor ka jingbym biang ka rukom pynlong ïa ka NEET Exam ha nongbah Jowai kaba dei ruh ka sien ba nyngkong ban pynlong ïa kane ka NEET Exam ha Jaiñtia Hills ha kaba kila don haduh 400 ngut ki samla pule kiba wan ïakhun ïa kane ka Exam, kiba la kynduh ïa ka jingklumar ïa ka rukom ïoh ïa ki jingkylli.
La pynsngew ha katei ka Exam ki jingkylli (paper) kila wan ha ki ar bynta kata ka MNOP bad ka QRST bad kane kala pynklumar ïa ki samla ba thoh exam kiba la hap ban jubab lang ïa kitei ki jingkylli, nalor ba ki hap ban ap palat ïaka por ba la buh ban thoh exam.
Halor kane ka jingkynduh jingeh jong kitei ki samla ba ïakhun NEET Exam na ka liang ki ar seng na ri lum Jaiñtia kiba kynthup ïa ka KSU bad JSU ki la kyntu jur na ki bor sorkar ban pynlong biang sa shisien ïa kane ka Exam ha Jowai, khnang ba ki samla kin ïoh ban thoh biang ïa kane ka Exam khlem Kano Kano ka jingpynthud.
Kitei ki ar seng kila phah kopy ïa kane ka juh ka jingthoh sha u Myntri Rangbah ka jylla bad kumjuh sha u Deputy Commissioner, West Jaiñtia Hills District, Jowai ba kin leh ïa kaba donkam.