Ka Meghalaya Branch of the Indian Red Cross Society (MIRCS) ha ka jingiashim bynta lang ban rakhe ia ka sngi kha jong u nongseng jong ka Red Cross Movement u Henry Dunant ia kaba la tip kum ka World Red Cross Day la pynlong ia ka prokram ha Raj Bhavan, Shillong.
U Lat jong ka Jylla Meghalaya u Phagu Chauhan uba dei u President ka Meghalaya Branch of the Indian Red Cross Society ula long u kongsan, ha ka jingiadonlang u bah Shanbor Shullai, MLA, u Principal Secretary to the Hon’ble Governor u Harish Chandra Choudhary, IFS, u President ka Red Cross Society Shillong u bah R.O. Wahlang, ki heh ophisar sorkar, ki dkhot jong ka Red Cross Society bad kumjuh ki nongshah khot sngewbha.
Haba ai jingkren ha kane ka sngi u Lat ula pynkynmaw ia ki jingthmu ha ba seng ia Red Cross Socity. Ha ba kreh halor ka phang pdeng jong kane ka jingrakhe “Keeping Humanity Alive”, ula iaroh ia ka jingkyrshan pura bad ka jingaiti jong baroh ki dkhot kiba dei ki Life Member jong ka Red Cross na ka bynta ban pynbit pynbiang ia ki jingthmu jong ka Red Cross. U la ong shuh shuh ba ka jingiai kyrshan jong ka dkhot ha kaba pynioh ia ki lad jingiarap sha baroh kiba donkam la ka dei hapoh ki shnong ki thaw ne wat shabar ri. U la iaroh ruh ia ki khynnah skul kiba la pyniasoh ialade bad ka Red Cross na ka bynta ka jingkut jingmut jong ki ban ioh ia ka jingstad bad pynioh I aka dur kaba thymmai ia ka lawei.
U Chairman jong ka Meghalaya Branch of the Indian Red Cross Society, u bah R.O Wahlang, IFS (Rtd), ha ka jingkren pdiang ula iaroh ia ka jinglong shlur jong ki Volunteer jong ka Red Cross ha kylleng ki bynta jong ka pyrthei bad pynpaw ia ka jingdonkam ban ioh shibun ki Volunteer ban pyniasoh bad ka Red Cross.
Ha kane ka jingialang u Lat ula pyllait ia ka Lama jong ka World Red Cross bad aiti ruh ia ki 61 tylli ki Syrnot sha ki Life Member jong ka Meghalaya Red Cross Society. La pule ruh ia ka World Red Cross Day Pledge. La pynphuh pynphieng ia kane ka sngi da ki jingrwai, ki jingshad bad ki jingialehkai drama bala iashim bynta da ki khynnah na ki skul bapher bapher.
