Ka President jong ka ri India ka Droupadi Murmu mynta ka sngi ka la pynkup burom ia ka kong Silbi Passah da ka khusnam Padma Shri, ha ka jingialang kaba la long ha nongbah New Delhi.
Ka kong Silbi Passah, ka dei kaba shong bas ah ha Riatsamthiah, Shillong. Ka dei ka nonghikai Hindi kaba la shongthait, ka dei ruh ka resource person jong ka Sarva Shiksha Abhiyan (SSA) bad DERT (Directorate of Educational Research & Training) ka la long ka nongiarap ha SCERT, DERT, ban ai jinghikai halor ka Art and Craft, Acting, Dancing bad Singing. Ka la a jinghikai ruh ha Institute of Khasi Jaintia Folk songs and Traditional Musical Instruments.
Ia ka kong Silbi la kha ha ka 3 tarik u Lber (March), 1952, ka la pyndep ia ka Bachelor in Hindi (Kovid) bad rung ha ka kam hikai ha ka subjeck Hindi ha Khasi Jaintia National Government Upper Primary School, Mawkhar Shillong ha u 1982. Ban pynkiew ia ka Hindi kala ju iashim bynta ha ki prokram Radio halor ka phang “Hindi Lesson”, kaba la pyllait da ka All India Radio Shillong (AIRS). Na kata ka daw la jied ia ka da ka Central Institute of Hindi (Agra) ha u snem 2005 na ka bynta ban thoh ia ka kot Hindi-Khasi Contrastive Grammar.
Ka kong Passah ka long ka briew kaba don mynsiem bha ban pynkiew ia ka kolshor lyngba ka rwai ka siaw. Lyngba ka tnad Art and Culture ha ka jingiatreilang bad ka North East Zone Cultural Centre (NEZCC) ma ka bad ka kynhun jong ka kila ioh ia ka lad ban iashim bynta ha kiba bun ki prokram jong ki festival bapher bapher ba kynthup ia ka South Zone Cultural Centre, South West Zone Cultural Central, West Zone bad kiwei kiwei de. Dei lyngba kine ki prokram kala ioh lad ban pyni shabar ia ki riti ki dustur jong ka jylla Meghalaya.
Ka la long ka kynthei Khasi kaba nongkong eh ban pynmih ia ka jingialehkai skit ha ka ktien Hindi kaba la ai kyrteng ka “Hindi Bhasha Hamari Rashtra Bhasha Hai” ia kaba la pyni ha ki TV lyngba ka Doordarshan Kendra Shillong. Dangshen ka kynhun jong ka kong Passah kila ioh ban pyni ia ka jingshad tynrai ha ka prokram jong ka “Adi Shaurya Parv Parakram ka” 2023.
Ka kong Passah ka la ioh ruh shibun ki wei pat ki khusnam. Kala ju ioh ia ka District Certificate of Honour ba la ai da ka State Government 2001, na ka Seng Khasi, Seng Kmie Honorary Award (2008); State award (2005); People’s Choice Award NETV (2005); National Award for teachers (2006); Jeebon Roy Award (2008); Khasi Jaintia Welfare Award (2009); International Gold Star Award (Bangkok 2010); Seng Samla Seng Kmie Honorary Award (2011); Lady of Hope (Cape Town South Africa) (2012); U Tirot Sing Award for Art and Literature (Meghalaya 2014); Youth Affair Award (2019); 4th Northeast Unsung Heroes red carpet social award (2021) bad ka Sangeet Natak Academic Award (2021).