Ka seng JSU Seng Kmie mynta ka sngi ka la ai da ka jingthoh ha u DC ka West Jaiñtia Hills District ban kyrpad ban peit bniah bha ia ki Examination Center shuwa ban pynlong iaka CUET Exam khnang ban lait na ki jingleh thurmur ki nongpyniaid exam kumba la jia ha u taiew ba lah dep ha ka por ba thoh ki samla ia ka NEET Exam ha St. Mary’s Mazzarello Sec. School Jowai.
Ka seng ka la ai jingmut ia ka bor pyniaid Distrik lyngba u DC ba dei ban leit peit ia ki examination center ban khmih hi da la jong ki khmat hato ka lah biang ne em ka rukom pynkhreh ban thoh ki khynnah ia ka eksam CUET kaban sa pynlong shen ha ka 15 tarik haduh 18 tarik mynta u bnai.
Na ka liang ka bor Distrik ki la ong ba kin sa shim ia kane ka jingai jingmut ka seng JSU bad kin sa khot shuwa da ka jingialang bad ki nongpyniaid eksam shuwa ban pynkreh ban thoh ia ka CUET eksam ban lait na ka kynrum kynram khnang ban ym duh nong ki khynnah pule kiban sa thoh eksam hapoh ka Distrik da kiba don da ki hajar ngut.
Ka seng ka la shim khia ban leh ia kaba dei eh khnang ba ki khynnah pule na ri lum Jaiñtia kin sngew shngaiñ ban thoh ia ka eksam ha la ki center ba la pynkhreh ia ki bad ban lait na ka jingleh thurmur ki nongpyniaid eksam khnang ba kan iaid beit iaid ryntih.