-Ym pat ju don ki khyllung ba iap ne ba khaiap ha Umkiang PHC-
Ka jaka ai jingsumar, ka Umkiang PHC ka dei kaba don ha ka thaiñ khappud bad ka Assam bad kumjuh ruh ka khappud bad ka ri Bangladesh, ïa kane ka PHC la pyniaid da ka Karuna Trust, ka dei ka jaka ai jingsumar kaba la i donkam ban pynbit pynbiang bha namar ki dang don shibun bha ki jingduna ha kane ka jaka ai jingsumar.
Ha ka jingjurip ba dang shen, da i nongthoh khubor la lap ba kane ka PHC ka don tang ar tylli ki kamra ba thiah ki nongpang, kaba don san tylli ki jingthiah ha kawei ka kamra, la lap ba ha kawei ka kamram ki nongpang ki la shu ïa thiah lang bad kynthei bad shynrang namar ba kawei pat ka kamra la hap ban pyn thiah ïa ki longkmie kiba kha khyllung lem bad ki khyllung ba dang kha.
Haba ïakren bad u Dr. B. Sumer, uba dei u Medical Officer (MO) jong katei ka PHC u la ong ba ym banse ban pynthiah lang ïa ki nongpang kynthei, shynrang hajuh namar ba duna palat ki kamra thiah, ki don tang ar tylli, kawei ka kamra hap ban buh noh na ka bynta ki longkmie ba kha khyllung bad ki khyllung ba dang kha, u Dr. Sumer u la iathuh ruh ba kane ka Umkiang PHC ka dei ka PHC kaba la ioh ruh ïa ka nam hapoh East Jaiñtia Hills District kum ka PHC kaba ym pat ju don ki khyllung kiba iap ne kiba kha iap mynta la san snem tam.
Sngewtynnad ban tip ruh ba ha kane ka PHC ka la don ka tnat ICTC (Integrated Counselling & Testing Centre) bad ka don ruh ka tnat OST (Opioid Substitute Therapy), Katei ka ICTC ka dei ka tnat kaba test HIV bad kaba ai jingiasyllok ruh ïa kito kiba don jingpang HIV bad kito kiba suba ba don HIV, tangba sngewsih pat ba ki dang duna shibun ki kamra khamtam haba pynlong ïa ka jingiasyllok ne counselling ïa kito kiba donkam ïa ka jingiasyllok ba jar jar, namar bunsien hi haba iasyllok donkam ki kamra ba kyrpang ne ki privacy room.
Katei ka OST pat ka dei ka jaka ba ïa syllok bad ba ai jingsumar ïa kiba dih drok khamtam kito kiba la kyrni ha u drok, kum kine ruh donkam ban don da ki kamra ba biang ban ai jingiasyllok.
Ki Doctor bad ki nongtrei jong ka Umkiang PHC ki ju shim khia bha ha kaba iasyllok, kumjuh ruh ha kaba pynlong ïa ki prokram ai jingpynshai ne ki awareness prokram halor ka HIV bad ka jingsniew u drok, ki ju leit wat sha ki shnong kyndong ba jngai ruh kiba sha khappud bad ka ri Bangladesh ban pynlong prokram ai jingpynshai, ha kajuh ka por ki ju shim khia ruh ban bud dien.
Ha kaba ïadei bad ka jingwan poi ki nongpang ha Umkiang PHC, u Dr. B. Sumer, u iathuh ba ki ju don haduh kumba 70 ngut ki nongpang ha ka shi sngi, kynthup ruh kito kiba mynsaw malu mala na ka daw ka jingiatyngkhuh kali ha surok National Highway bad kiwei kiwei ki jait jingpang, la ong ba wat ki shipai BSF ruh kiba don hajan ki ju wan shim dawai na kane ka PHC.
Kumban shu bynrap, ka Umkiang PHC ka dei ruh ka jaka ai jingsumar kaba don hajan ka surok National Highway-6, East Jaiñtia Hills District, kumta kiba bun ki nongñiah kali, kiba ñiah trok, ñiah bos, kiba ñiah kali rit ruh bad kiwei kiwei, kumjuh ruh ki nongleit nongwan kiba na ki jaka ba jngai ki ju wan shim dawai na kane ka PHC haba lap ka jingpang jingshitom ha ka jingiaid lynti, kumta la i donkam ban pynbit pynbiang bha ïa kane ka PHC bad la i donkam ban don ruh ka emergency room kaba paka khnang ba kan nym buh jingeh than ïa ki doctor ki nurse kiba trei ha katei ka PHC bad la i donkam ban don ruh ka jaka ïeng kali (parking) kaba biang ban pynsuk ïa ki nongpang.
Katei ka PHC ka dang i donkam bha ban don ki karma kiba biang ban buh ïa ki tiar ki tar namar kumba long mynta ïa ki tiar ba donkam la hap ban shu buh pathar shane shatai na ka daw bym don ki karma ba biang.
Ka Umkiang PHC ka kynthup ïa ki 23 tylli ki shnong, kiba bun ki dei kito ki shong kiba don ha khappud bad ka ri Bangladesh kum ka shnong Huroi, Hingaria, Lejri, Lailong, Kuliang bad kiwei kiwei, ki don lai ngut ki doctor ha katei ka PHC ba kynthup u Dr. Anil Bharati, uba dei u Medical Officer uba incharge, u Dr B..Sumer (MO) bad i Dr. (Miss) Waimon Suting.
La iohjingtip ruh ba myn ha ki snem kiba la leit, ki nongtrei jong ka tnat ka koit ka khiah, ki la dep wan jurip ïa katei ka jaka ai jingsumar, ha kaba ki la don jingmut ruh ban shna bha noh ïa katei ka jaka ai jingsumar (infrastructure) namar ba ka la rim bha, hynrei haduh mynta kane ka jingthmu kam pat shym la urlong satia, kaba dang lah ban urlong mynta dei tang ka Transit Home, kaba la shu shim ïingwai ha Umkiang, kata shabar ka PHC bad kane ruh la siew bai wai da ka CMSMS Fund, ha kane ka Transit Home ki don ki kamra thiah ha kaba kito kiba na ki shnong ba jngai ki lah ban sah miet lada donkam ïa ki jingiasyllok ne donkam jingsumar.
Ka tnat ka koit ka khiah ka la aiti ruh ha ki Village Health Organisation (VHO) ba kin peit lem ïa kane ka Transit Home ha ryngkat ka jingiatreilang bad ka PHC Umkiang, na ka liang u Dr. Sumer, u la pynpaw ba ka PHC ka donkam ka jingiatreilang bad ki paidbah khamtam bad ki VHO jong ka thaiñ.
