Ka projek halor ka “Scheme on Studies for Promotion & Strengthening of Black Pottery at Tyrshang and Larnai village, West Jaiñtia Hills District, Meghalaya” ïa kaba la bei pisa da ka Department of Commerce and Industries (DCI) Shillong bad la pyntreikam da ka Mahatma Gandhi Institute of Rural Industrialization (MGIRI) Wardha, Maharashtra, R&D Institute hapoh ka Ministry of MSME, jong ka sorkar kmie kaba la ai jinghikai baroh shisnem pura la pynkut ïa ka mynta ka sngi 14 tarik u Jymmang, 2024.
Ha kane ka projek ai jinghikai ba shisnem, ka MGIRI kala pynlong ha ki ar bynta, ka bynta – I ka long ban pule bniah ïa ki khiew khyndew bala dep shna bad halor kano ka rukom ban pynwandur ïa ki, katba ka bynta-II la leh naka bynta ban ïoh tip shaphang ki lad ai jinghikai ïa kane ka kam khnang ban kan neh kan sah ha ki pateng ban wan.
Ha kane ka sngi pynkut ïa ka prokram ha ka jingïalang bala pynlong ha Larnai Community Hall ha kaba la wan ban ïadonlang da u bah M.L Wanshong, Joint Director DCI, Shillong, bah B. Warjri, General Manager, DCIC, Dr. K Venkata Rao, Dy Director MGIRI, kong S. Kharpran, Functional Manager, DCIC, Jowai, Larnai Village Chairman, bah Kyrmenlang Pyrtuh bad ki nongthaw khiew khyndew jong ka thaiñ.
Na ka liang u Dr. K Venkata Rao, Dy Director MGIRI, Wardha haka jingkren ula ai ka jingkitbok kitrwiang ïa baroh ki nongthaw khiew khyndew kiba don shisha ïa ka sap ba kyrpang bad ka jingtbit jong ki ha kane ka kam lyngba kane ka training kaba ki la ïoh.
U bah M.L Wanshong, Joint Director DCI, Shillong ula ai ka jingïaroh ïa ka kynhun jong kane ka projek, kiba la treishitom ban ai jinghikai ïa ki nongthaw khiew da kaba leit ïalam kumjuh ïa ki sha Siliguri bad sha Varanasi ba kin ïoh ban pynjanai shuh shuh ïa ka sap jong ki. U la pynsngew na ka liang ka tnad Commerce and Industries kan dang ïaibteng ban ai ka jingkyrshan ba pura ha kane ka kam.
U Dr. K Venkata Rao, Dy Director MGIRI ha ryngkat ka kynhun jong u, ha ka jingkren ula pynpaw ka jingsngewkmen halor kane ka project ai jinghikai ba shisnem ïa ki nongthaw khiew, ha ka juh ka por kan ïarap ba kin ïoh jingtip shuh shuh shaphang kane ka kam da ka jingleit mih jong ki sha kitei ki jaka ba shabar ka jylla nalor ka sap kaba kila don lypa.
Kum ban shu pynkynmaw kane ka projek ka long shi bynta ban pynkiew ïa sap kyrpang ka riti ki dustur, la hikai ruh kumno ban pynïaid ïew ïa kitei ki mar, ka rukom pynmih ïa ki mar, ka jingïoh nong, ka rukom seng kam seng jam, ban pynheh ïa ki karkhana, ban pynjanai ïaka rukom shna khiew katkum ki juk stad ba mynta bad ban pynkhlaiñ shuh shuh ka rukom pynmih ïa kine ki khiew khyndew.
