Ka long kaei kaei ka jingjia ba sngewtynnad haba ka wei na ki jaka sah ba lum ba lang ia ki briew kiba la duh jingkyrmen ka ‘Sabahmuswang Halfway Home’ ka la lah ban pynioh biang ia ka jingim kaba bha ia kawei na ki nongpang kaba la tip kyrteng ka Jiratan Bibi, da kaba pyniakynduh biang ia ka bad kiba haïing ha sem jong ka hadien 3 snem ba ka la ïaid wir ba ka don jingshitom ha ki bor pyrkhat.
Ia ka Jiratan Bibi la wan buh ha Sabahmuswang Halfway Home la 9 bnai ha kaba kala ioh shibun ki jingsumar sukher bad dei mynta ka sngi pat ki bor ba dei peit jong kane ka jaka ha ryngkat ki bor pyniaid District ba la wan mihkhmat da ka kong D.V. Lyngdoh, Addt. Deputy Commissioner, West Jaiñtia Hills District, ka kong R. Passah, District Social Welfare Officer, Jowai, u Dr. H.H. Mohrmen, Secretary ka SURE, ka kong Niwanka Shylla ka Project Coordinator bad baroh ki nongtrei jong kane ka Halfway Home, kila iadonlang bynta ban lehburom khadduh ia ka Jiratan bad ban aiti noh ia ka sha kiba haïing hasem jong ka kiba na ka Jylla Assam, hadien ba la dep ban jurip ia ki kot ki sla kiba pyni ia ka jingdon jingiadei jong ki.
Haba ai jingkren ha kane ka sngi ka kong R. Passah, DSWO kala iathuh ba ka jingthmu hi jong ka Halfway Home ka long ban wad ia kiba haïing hasem jong ki nongpang kiba la wan buh hangne khnang ban ioh pyniakynduh biang ia ki.
Na ka liang ka kong D.V. Lyngdoh, ADC kala pynpaw ia ka jingsngewkmen kaba khraw ban tip ba kane ka dei ka jingjia (Case) kaba nyngkong eh hapoh ka Jylla, ha kaba ia ki nongpang kiba jah na la ïing bad kiba la ioh jingsumar ha Halfway Home la lah ban pyniakynduh biang bad la kiba haïing hasem. Kala iaroh ruh ia ka Sabahmuswang Halfway Home kaba la trei shitom ban wad ia kiba haïing hasem jong katei ka longkmie.
Katkum ka jingjia la iathuh ba kane ka longkmie kaba la 58 snem la wan ban pynthiah pang ha ka MIMHANS, Shillong naduh ka 7/6/2022 da ki bor Pulit bad bor District jong ka Ri Bhoi, hadien ba la lap ia kane ka briew ba ka iaidwir ha ki bynta jong ka shnong Byrnihat na ka daw jong ka jingshitom ha ki bor jingmut jingpyrkhat.
Hadien ka jingshah sumar ha MIMHANS la pynkynriah noh ia ka sha Halfway Home kaba don ha Sabah Muswang ha ka 11/8/2023. Haba kala don hangne ka la ioh shibun ki jingsumar bad la pyrshang ban pynrung kyrteng Aadhaar noh ia ka. Dei hangne ba ki kor ki bor ki pynpaw ba kane ka longkmie kala dep pynrung kyrteng shisien ka sngi, ha Jylla Assam. Ha ka jingwad biang la lap noh ia ka kyrteng jong ka kum ka Jiratan Bibi, ka khun jong u Jadab Ali. Nangne la phah noh ia ka kyrteng jong ka sha ka District Task Force ban leh ia kaba donkam.
Dei ha ka 15/5/2024 ka Nawanka Shylla kaba dei ka Project Coordinator jong ka Half Way Home, Jowai kala kynjoh ktien bad ka paralok jong ka na Assam Don Bosco University, Assam bad ia kren ia ka jingjia halor kane ka Jiratan Bibi. Dei lyngba katei ka paralok na Assam ba la ioh ban iakren bad ki ba haïing jong ka Jiratan Bibi. Khnang ban ioh pynshisha na ka liang jong kiba haïing jong ka ruh kila ban jingbit na ki nongpyniaid jong ka Halfway Home ban iakren phone bad ka. Ha ka jingiakren phone kine baroh arliang kila pynpaw ia ka jngiaithuh markylliang, ki ummat jingkmen na baroh ar liang kila jaw, namar ka jingkmen ban tip ba kane ka dkhot jong ka ïing jong ki ka dangim haduh mynta, la iathuh ki nongpyniaid kiba iohsngew ka sur jingiam jong kitei ki dkhot jong ka ïing.
Hadien ka jingiakren sngewthuh jingmut na ka liang jong kiba haïing kila kloi ban wan shimti noh ia katei ka longkmie. Na ka ling jong kiba haïing ka Jiratan Bibi kila pynpaw ka jingsngewnguh kaba khraw ia ki nongtrei jong ka Halfway Home. Uwei na ki khun jong kane ka longkmie u Bahar Ali, ula pynpaw jingkmen kaba khraw bad ka jinghun mynsiem ban ioh biang iala ka kmie hadien bala jah da ki snem.
Na ka liang jong u Dr. H.H. Mohrmen ula ong ba ka SURE ka dap da ka jingkmen ba kane ka jingjia (Case) ka kut noh hapdeng ka jingkmen, da kaba ioh ban aiti ia kane ka nongpang sha kiba haïing hasem ba ieit jong ka.
