Ka Federation of Khasi Jaiñtia & Garo People (FKJGP) Lama Unit hynnin ka sngi 16 tarik hapoh ka jingïalam u President samla Lamchwa Dong ha ryngkat ka jingsynran lang u President ka FKJGP SEBA Circle u Mathew Pajat, kumjuh u President bad u General Secretary ka FKJGP East Jaiñtia u Deihok Sumer, kila leit ban ïa kynduh ïa u District Medical & Health Officer (DMHO), East Jaiñtia Hills District Khliehriat u Dr. Dominic Shylla ban pan jingshai halor ka rukom shna ïa ka Sub Centre ba don ha ka Shnong Lama, East Jaiñtia Hills District.
Ka seng ha ka jingïakren bad u DMHO ula pynsngew ba ka jingshna ïa katei ka ïing ka hap hapoh ka skim shna pynbha (Renovation) bad kiwei de ki jingshna kum ki thliew ban bret ïaki tiar nep (Sharppit Hole) kum ki thyrnia bad kiwei de kiba la dep pyndonkam.
Ula ïathuh ba ka sorkar ka don jingthmu ban shna ïa ki ïing sah na ka bynta ki nongtrei kum ki (Quarter) jong ki 2 Unit haka jinglut kaba 20 lakh na ka bynta kawei ka Sub-Centre kiba don hapoh ka East Jaiñtia Hills.
Na ka liang u DMHO ula ong na ka bynta ka jingshai ba kham bniah halor kane lah ban ïoh jingtip na ka ophis u Mission Director, NHM jong ka jylla Meghalaya kaba dei peit bad ka jingshna ïa ki ïing sah jong ki nongtrei lyngba ka pisa ba shim ram ka sorkar na ka World Bank.
Ka Seng kala kyntu ïa u DMHO ba un shimkhia dalade ba ka jingshna ïa ki ïing sah jong ki nongtrei lyngba ki skim ba wan na ka sorkar dei ban long kiba bha bad kiba skhem bad ym dei ban shna tang dep ïa kino kino ki ïing sorkar, kiba tang katto katne por la hap ban maramot biang.
Na ka liang utei u DMHO ula pynsngew ha ki nongïalam ka seng kum u khlieh ha ka tnad ka koit ka khiah jong ka District u kyrmen skem ba ki Contractor ba pyntrei ïa kitei ki kam kin trei da kaba bha tam, khnang ba yn ïoh ban pyndonkam hok ïa kitei ki ïing.
Ka Seng FKJGP, Lama Unit kala pyntip ba kane ka jingleit ïakynduh DMHO kam shem don kano kano ka jingthmu ban leit pynthut ïaka kam hynrei tang ban ïoh jingshai bad ban jurip bniah ïa ka rukom shna, khnang ba kan long kaba bha bad kaba skhem pynkut ka kyrwoh khubor ba la phah da u President ka FKJGP, Lama Unit u Lamchwa Dong.
