Ki khynnah skul jong ka Q. C. Springside, Jowai mynta ka sngi 20 tarik Jymmang, 2024 naduh ki Lower Primary haduh ki Secondary Level kila mih sha surok ban pyndep ïa ki ar tylli ki bynta katkum ka hukum bala pynbeit daka ophis treikam jong u State Project Director SSA & Director of School Education & Literacy, Meghalaya Shillong ha kaba ïadei bad ka prokram TOFEI.
Ha kane ka jingmih surok (Rally) jong kitei ki khynnah skul la sdang na Mynthong bad ïaid lyngba ka Iawmusiang-Chutwakhu, kiba la pyrta jam halor ki jingsniew kiba mih ha ba pyndonkam ïa u Biri, Sikret bad Duma kaba long shi bynta naka World No Tobacco Day Rally.
Ha kane ka sngi ki khynnah skul kila pyrta paidbah kumjuh shaphang ka jingdonkam ban ïa ka jingkoit jingkhiah ha ki jingmut jingpyrkhat ne ka Mental Health Awareness Rally.
La pynkut ïa kane ka jingïaid surok ki khynnah skul ka Q.C. Springside da ka jingshim bynta jong ki ban tah ïa ki dur (Poster) ha ki kynroh kaba pyni ïa ki jingma jong u sikret, biri, duma khang ba ki paidbah ki long kiba phikir bad ban kiar na kine ki jingdih basniew.
