Ka long ka jingjia ba sngewsih haba ka ïingmane jong ka Balang Presbyterian Mupliang, West Jaiñtia Hills District kaba hap hapoh ka Nangbah Nangjngi Hadem Presbytery, haka step phyrngap jong ka sngi Balang 22 tarik Jymmang 2024 haka por kumba 1 baje shiteng kala shah bam duh haka ding kaba la klang bha bad pynkylla dpei lut ïa baroh ki jingdon jingem hapoh ka ïing mane.
La ïathuh da ki trai Balang kane ka jingjia pluh ding ka lah ban jia naka daw ka jingthut jong ka bording (Electric) kaba la sdang na ka jaka (Store Room) ba buh lang ïaka Generator bad kiwei de ki tiar ki tar ba pyndonkam ha ïing mane.
La sakhi ïa kane ka jingjia dei ha ka por 2 baje ha kaba ka ding kala poi kiew shaduh tnum jong ka ïing mane, dei ha kata hi ka por ki dkhot jong ka Balang ki la sdang ban tied da ka baje ïing mane ban wad ki lad ki lynti jingïarap, hynrei na ka jingjur palat jong ka ding ba klang wat tang ban leit hajan ka ïing mane ruh ym lah shah shuh bad la hap ban shu peit na pajih jong ka surok.
Na ka liang ki kali pynlip ding kiba la wan poi naduh Jowai tad haduh ba poi ha katei ka jaka kumba 1 kynta eiei ka ding kala ïoh ban bam lut khoit ïa baroh ki jingdon jingem hapoh ka ïing mane.
Haba ïakren bad ki ar ngut ki Tymmen Basan jong ka Balang u Tbn. K. Ryngkhlem bad u TBn B. Ryngkhlem kiba dang don haduh ka por 11 shiteng mynstep lem bad ki longkmie, ki longkpa kiba dang shong ha phyllaw jong ka ïing mane ha ryngkat ka jingsngewsih kthang ka mynsiem halor ka jingduh jong ki ïa katei ka ïing ban mane Blei, ki la ïathuh ka jingduh nong jong ki mar ki kynthup naduh ki Sound System kiba dang dep buh thymmai, ki tiar tem naduh ka Drum, ki Guitar Light lai tylli, ar tylli ki Casio, ki tiar ba donkam jong ki seng kynthei, ki khiew ki pliaw, ki tiar ba pyndep Sacrament, ki pla lum jingainguh, ki shuki bad baroh kila kylla dpei liut, la kumno kumno ka jingduh nong ha kane ka jingjia ka lah ban kot da ki klur tyngka.
La ïathuh ba kane ka ïing mane jong ka Balang ka dei kaba lai ïa kaba la tei thymmai kaba la don mynta 15 snem eiei bad kumba long mynta ki ïing khristan jong ka Balang ki don duna ïaka 200 ïing, ki dkhot ki don 800 ngut tam, ki Tymmen Basan 7 ngut bad 11 ngut ki Rangbah Balang ne ki dkhot Committee Balang.
Kawei na ki longkmie jong ka Balang ka khlem da lah shuh ban pynpaw ïa ka jingsngewsih halor kane ka jingjia kaba la jaw ki ummat kthang ban tip ïa kane ka jingjia ba sngewsih, da kaba buh ruh ka jingkyrpad ban kyntu jur ban wan ai jingïarap lem ïa ka Balang kaba la duh noh ïaka ïing mane ban shakri Blei.
