Ka ophis jong u District Horticulture Officer, West Jaiñtia Hills District kala pynlong ïa ka ïew pyni nam ïaki mar rep, kaba la tip kum ka “Horti Fair Cum Exhibition under MIDH Scheme 2023-2024”, bala pynlong ha Community Hall jong ka Dorbar Shnong Ladthadlaboh, Jowai.
Ka jingthmu ban pynlong ïa kane ka ïew pyni nam ka long kyrpang ïa ki nongrep kiba don hapoh ka District, ba kin pynpaw pyrthei ïa ki mar rep jong ki, ïa kaba kila trei shitom ha baroh saw aiom jong ka snem bad kane kan ai mynsiem kumjuh ïa ki nongrep ka thaiñ lyngba ka jingsam ïa ki khusnam ïa ki ha kane ka ïew pyninam.
Ha kane ka sngi la wan ban ïadonlang da u kongsan jong kane ka sngi bah B.S Sohliya, IAS, uba dei u Deputy Commissioner ka West Jaiñtia Hills, ka kong D.C Sohtun, MAS, Director of Horticulture jong ka Jylla, bah S. Rani District Horticulture Officer, kong A.M Pasweth Horticulture Development Officer, kong H.M.L. Kynta, MCS, Additional Deputy Commissioner, u ma A.B.M Shullai Waheh Shnong Ladthadlaboh nalor kiwei de.
Ki nongrep kila wanrah ïa ki mar rep jong ki, kiba kynthup ïa ki soh ki pai, ki jhur ki jhep, ki syntiew, ki umsoh, ki achar ba bun jait, ka pylleng, ki dohkha bad kiwei kiwei de.
La ïoh ruh ka jingkren na uwei na ki nongrep ka thaiñ Laskeiñ ma Rihokmiki Rabon, uba la pynsngew halor ka jingïarap jong ki tnad sorkar naduh ka Horticulture, Agriculture, Fisheries bad kiwei de lyngba ka ophis jong ki Block Development Officer. Kum u nongrep u ai khublei ïa ki ophisar kiba dei peit ïa ki nongrep khamtam ïa u Shynrai Lakadong ula ailad ïa ki briew ka shnong ba kin im na ka kam rep Shynrai. Ula ong ki nongrep ki dei kiba hakhmat eh ha ka jylla kiba lah ban pyndap pynbiang ïa ka bam ka dih jong ki nongshong shnong.
U ma Rabon ula long ruh ba ka jingeh kaba ki nongrep ki ïakynduh mynta ki sngi dei ka jingduna jong ka um, kaba la pynduhnong eh ïaka rep ka riang bad ula kyntu ïa ki ophisar ba kin shimkhia ïa kane ka jingdonkam.
U Chairman ka Lakadong Turmeric Cooperative Union Ltd. Jaiñtia ma Mejes Tmung ula batai shaphang u GI Tag uba ïarap ïa ki nongrep ka thaiñ ban kam trai ïala u jong u mar rep bad ym don shuh kiba nabar kiba lah ba kam trai ïa une u mar da ka jingdon jong ka shap Logo wat ki company ba pynïaid ïew kila ai kyrteng beit ha ka kyrteng tynrai ba pynmih ïa u.
Ka kong D.C Sohtun, MAS, Director of Horticulture jong ka Jylla, kala pynpaw ka jingsngewkmen ban wan poi ha kane ka sngi, kum ka lad ban ïakren bad ki nongrep khamtam shaphang ka skim MIDH kaba wan na ka sorkar kmie kaba long 90 persent bad 10 percent na ka sorkar jylla.
Kala ong na ka liang ka sorkar kala dep pynithuh GI Tag ïa u soh ñiamtra ha ki snem bala dep bad kala pynsngew ruh shaphang ki skim ban pynheh ïa ka jaka rep, ki ïing Plastic ban rep, nalor ka subsidi ban thied ïa ki mar rep, ki nongrep kiba kwah jingshai ki lah ban leit ïakynduh ïa ki ophisar namar ka Jaiñtia Hills mynta kala kiew bha ha ka kam rep kam riang da kaba thaw ïa ki kynhun ban ïoh nong khambun na ka sorkar.
U kongsam bah B.S Sohliya haka jingkren ula pynpaw ka jingsngewnguh ïa ka jingtreikam jong ki ophisar ka District kiba la treishitom ha ka kam rep kam riang. U ong ruh ba ka long kaba donkam bha ka jingiaphylliew jingmut lang kum ki nongrep bad ka tnad sorkar, kum ka District kan peit bniah ban pynioh ïa ka hok ki nongrep ban kam trai ïa la u jong u marrep, ha kaba un pynlong ka jingïakren bad u District Horticulture Officer ha kine ki sngi ban wan.
Ym dei ban kut tang ha ki ïew pyni nam hynrei dei ban nangtrei shitom ha ka kam rep na ka bynta ka pateng ban wan da kaba pynneh pynsah ïa ka ki jaka rep ïa ki mar, ka tnad sorkar ruh ka long ka kloi ban ïatreilang na ka bynta ban pynbha pynmiat ïa ka kam rep kam riang, la ong shuh shuh u Deputy Commissioner.
La pynkut ïa ka jingïalang da ki kyntien ai khublei na u Demanson Lyngdoh, Assistant Director of Agriculture (Mkt) WJHD.
Ha ka por janmiet kala don ka Seminar ba pynïaid da katei ka ophis bad kala don ruh ka jingsam ïa ki khusnam sha ki nongrep.
