Hadien ka Synjuk Waheh Chnong Jowai (SWCJ) kala ïoh ha kti ïa ka Order Memo No. Gen.179/Pt.-VI/CA/MU/NGT/2023/7-A Dated Jowai the 24th May 2024, ka Synjuk hi baroh kawei, ka sngewdei ban ai khublei kyrpang bad sngew ïa u Deputy Commissioner ba u la pyntrei ïa ka kam kumba u la kular. Te, kumba ka Synjuk ka shimkhia ïa kane, ymtang ïa ki trai shnong hapoh Jowai, hynrei na ka bynta baroh ki nongshong shnong hapoh Jowai, ka la buh pat ka jingkyrpad ïa ka District Administration hi baroh kawei, ban pyntreikam ïa ka order na ka bynta ka jingmyntoi ki nongshong shnong hapoh ka shnong Jowai.
Ka Synjuk Waheh Chnong Jowai (SWCJ), hynnin ka sngi ka la leit ïakynduh ïa u Deputy Commissioner, West Jaiñtia Hills District, bah B. S. Sohliya, IAS, ha ka jingïade bad ka jingshahktah ka Wah Myntdu ha ki jakhlia ba bunjait ba wan tuid sha ka, haduh ba ka um ba poi na ka PHE Department ka la sinew lut, ym long shuh tang ban dih, ne pyndonkam.
Ha ka jingïakynduh bad u tei u khlieh jong ka District u la kular ban pynduh ïa kita baroh, da kaba ong ruh ban pynmih ïa ka order mar mar. Shuh shuh u la ai ka jingïaroh ïa ka Synjuk ba ka lashim khia ïa kane ka kam bad ruh kiwei ki kam ba ïadei bad ka jingmyntoi u paidbah ha ka shnong Jowai.
Shuh shuh ka Synjuk, ka khot ïa ka jingïatreilang ki shnong ba wan sha ka Sor Jowai, ki nongshong shnong baroh ban don ka jingkitkhlieh kumno ban pynkhuid ïa ka Wah Myntdu. Ka kyntu ruh ïa baroh ban ym bret pathar ïa ki ñiut kat sha ba lap, kane ruh ka long kawei na ki kam ban pynsniew ïa ki wah bad ruh ka pynsniew dur ïa ka shnong ka thaw.
Ka Synjuk ka khot ïa baroh, to ngin long kiba, ieit ïa ka jingkhuid naduh ïing haduh ki jaka ba ngi don, kum ka jingïarap ruh ïa ki bor badei peit ïa kane.