Ka Jaiñtia National Council – Central Executive Committee haka 25/05/2024 ka la ioh ban pynskhem noh ia u Ma SelfDaniel Lyngdoh kum u nongaibuit (Adviser) ba thymmai jong ka seng ha ka jingialang ba lyngkot ba la pynlong ha ophis treikam jong ka ha Khliehriat.
Ha katei ka sngi la iadon ryngkat lang naduh u President rangbah ka JNC u bah Sambormi Lyngdoh, bah Wanshwa Suting General Secretary, bah Nangjan Dkhar Vice President, bah Allmiki Ryngkhlem Asst Secretary, bah Philip J Bamon Chief organising Secy, lem bad kiwei de ki nongialam ka CEC bad ki Nongialam ki Unit ki Circle bapher bapher jong ka JNC.
Iaka jingialang la pyniaid da i President rangbah jong ka seng ha ryngkat ki kyntien pdiang burom ia baroh ki nongialam bad ki dkhot ka JNC bad kumjuh ruh u la shimti iaka kam haka ban pdiang burom kyrpang ia u Ma SelfDaniel Lyngdoh sha ka kynhun.
Ha katei ka jingialang lah ioh ia ki jingkren lyngkot na u Philip J Bamon, Nangjan Dkhar, bad na u GS Wanshwa Suting.
Iaka kam kaba kongsan kata ka jingiatehkular bad ka jingpynskhem ia u Ma SelfDaniel Lyngdoh ban long kum u Adviser ba pura ka JNC lah pyndep da u President rangbah bah Sambormi Lyngdoh.
Haba ai jingkren u President rangbah ka JNC Ula pynpaw iaka jingsngewnguh kaba khraw haduh katta katta ia u Blei Nongbuh nongthaw ba katba dang mih ki Sngi ki por ka seng ka dang khlaiñ shuh shuh khamtam ha kane ka bynta ba la lah ban ioh ia u briew kum u Ma SelfDaniel Lyngdoh u briew uba lah heh lah san kumjuh ruh uba lah iar ka jingmut jingpyrkhat bad kaba sngewnguh ruh ka long ba u dang don shisha ka mynsiem haduh mynta ban mih shakhmat ban trei na ka bynta ka eh ka shon jong ka Ri bad ka Jaidbynriew lyngba ka JNC.
U President ula pynkynmaw ruh ba u Ma SelfDaniel Lyngdoh u dei uba na ka shnong Sutnga bad uba ju long teng ruh kum u Waheh Shnong ka Shnong Sutnga, EJHD, bad u long ruh u briew uba juh iadon bynta bha ha ka imlang ka sahlang bad uba kloi ruh ban trei ryngkat lem naka bynta ka bha ka miat jong ka dong ka thaiñ bad iaka Ri hi baroh kawei, bad ka jingwan jong u Ma Self sha ka JNC kan wanrah ym tang ka jingkyrkhu hynrei kan sa pyndap lut ruh ia kiba dang sah dang duna haka liang ka jingshakri jong ka seng ia ka jaidbynriew.
U Ma SelfDaniel Lyngdoh haba ai jingkren ula ong ba mynta ka donkam bha ban iasnohkti lang bad ban iatrei ruh ryngkat ryngkat khamtam ha kum kine ki sngi ba la jyllei ki kam ba sniew khamtam u Drugs bad kiwei de ki ba pynsniewdur iaka imlang ka sahlang. U la kren ruh shaphang katto katne ki mat ki jura kiba lah ban ktah kum ka jingjur jong ka jingwan kyrthlep jong ki bar jylla katba nang mih ki sngi, bad hashwa ba un pynkut ula ong ruh ba shibun ki mat kiba yn sa pyrkhat bad shibun ruh ki kam kiba yn sa leh nangne shakhmat naka bynta ka jingmyntoi ym tang hapoh ka Shnong ka thaw, ka dong ka thaiñ hynrei ia baroh hi ka Ri bad ka Jaidbynriew.
La pynwai iaka jingialang da i President rangbah ha ryngkat ki kyntien kitbok kitrwiang.
