Ka sorkar jylla hapoh ka jinglamkhmat jong u Deputy Chief Minister bah Prestone Tynsong, ha ryngkat ki heh ophisar jong ka jylla, kila pynlong ïa ka jingshong jingïalang ha Committee Room 2 jong ka Main Secretariat Building, Shillong na ka bynta ban ïakren bad ïaphylliew jingmut ha ka jingïadei bad ka jingwan ïaid lynti jong ka erïong kaba la tip kum ka Remal ha ki bynta jong ka jylla.
Ha ka jingïadei bad kane na ka liang ka sorkar kum ka lad jingïada ïa ki nongshong shnong, kumjuh ruh ïa ki khynnah skul bad samla pule ha ki College bad ki University kala btah ïa ki bor pynïaid District lyngba ki Deputy Commissioner ba kin khmih bniah bad phikir ïa ka long ka man jong ka mariang, ha kaba ki lah ruh ban pynbna ïa ki shuti lashai ka sngi 28/5/2024 hala ki jong ki jong ki District.
U bah Tynsong ula pyntip ba na ka liang ka sorkar kala long kaba la pynkhreh na ka bynta kane ka jinglynshop mariang. Ula ong ba ki bor synshar naduh ka jylla haduh ki District bad Sub-Division la btah ïa ki ba kin shim khia ïa kane.
Ka sorkar ka la long kaba la kreh ha baroh ki liang la ka dei ha ki kam pisa pilaiñ, ki bor ka koit ka khiah, ki bor Pulit, ki bor jong ka Municipal, ka PWD bad kiwei de ki tnat sorkar ban long kiba ïatreilang na ka bynta ban ai ka jingïada ba pura ïa ki nongshong shnong ka jylla.
