U wei u rangbah briew ïa uba la tip kyrteng u Tellme Talang uba 31 snem ka rta na ka shnong Lapangap, la suba ba ula shah pynïap ha ki runar bym lah ban ithuh, hynnin ka sngi 29/05/2024 ha jan ka jaka rep pynthor kba jong u (KhliehLadaw) kaba don ha shnong Lapangap, West Jaiñtia Hills ha khappud bad ka Assam.
La ïathuh da u Waheh Shnong ka Lapangap ba utei u rangbah ula mih na la ïing dangstep ha ka por 5 baje ban leit sha lyngkha rep ha ryngkat u slap ba jur, ynda ula poi ha katei ka jaka rep la suba ba ula shah pynïap ha ki runar ki bym lah ban ithuh hapdeng ka jingïakhun.
Hadien ba utei u rangbah um shym la poi ïing shuh, kumta ki nongshong shnong mynta ka sngi kila leit wad ïa u bad ynda la poi ha katei ka jaka ba la tip ka Khlieh Ladaw kila lap ïa ka met ïap jong u kaba la thiah lyngkthar ha madan, kumta mar mar u Waheh Shnong ula pyntip sha ki pulit ban ïoh leh ïa kaba donkam ha kaba ki pulit kila poi kloi kloi ha katei ka jaka.
Kum ban shu pynkymmaw katei ka jaka kadei ka ba dang hap ha ka jingïakhajia pud hapdeng ki paid Karbi bad ka shnong Tahpat bad la suba jur ba kane ka jingshah pynïap u Tellme dei ha ki briew kiba nabar u pud jong ka shnong. La sakhi ruh ha ka met jong u ïa ki dak ki shim bad ki dak mong ha ki bynta ka khlieh, u synkai bad ha ka shyntur, ha kaba ki nongshong shnong kiba la sakhi ba utei u nongrep, ula pyrshang katba lah ban ïakhun haduh lai tylli ki jaka bad khadduh eh ïa ka met jong ula lap na ka jaka bala tip kum ka Khlieh Ladaw.
