U Deputy Commissioner & Chairman District Disaster Management Authority, East Jaiñtia Hills District ula pynmih ïa ka hukum ban khang shipor ïa ka jingïaid jong ki kali lyngba ka bynta kaba sniew jong u NH-6 kaba don ha shnong Lumshnong.
La ïathuh ba ka jingsniew jong utei u surokbah ka dei na ka jinglynshop ba jur jong u slap ha kaba ka um na ki bynta ban nalor lum kala lynshop ha ki bynta jong u surokbah kaba la wanrah ïa ka jingjulor utei u surokbah.
Kumta na ka liang jong u DC katkum ka bor bala bynshet ha u kata kum ka Section 34 (b) bad (m) jong ka Disaster Management, Act 2005 ula pynmih ïa ka hukum ban khang syndon ïa ka jingïaid jong ki kali na katei ka bynta ba la sniew, tad haduh ba la dep ban maramot ïa ka, khnang ban lait na kino kino ki jingjia ba sngewsih.
U DC ula bthah ruh ïa ki bor pynïaid jong ka National Highway Authority of India (NHAI) ba kin shim khia ïa kane ka jingjia kloi katba lah.
Na ka bynta ki kali rit ki la shah ïa ki ban ïaid lyngba ka surok jong ka Star Cement na poh u pud u sam jong ka bad ban pynïasoh pat bad u NH-6 kham shakhmat naba jia katei ka jingduhnoh jong u surokbah.
