Ia ka International Day of Persons with Disabilities la rakhe mynta ka sngi (3.12.2021) ha ïing skul Holy Trinity ha shnong Sutnga, Pdengshnong, East Jaintia Hills District halor ka phang pdeng “Leadership and participation of persons with disabilities towards an inclusive, accessible and sustainable post –Covid-19 World ”.
Ia kane ka prokram la pynlong da ka ophis District Social Welfare Officer, East Jaintia Hills District, Khliehriat ha kaba la iadon lang ka kong R. Passah kaba dei ka ophisar jong katei ka tnad, ka kong M. War Advocate, DLSA, Khhliehriat, ma W.M. Bamon, Manager DRCDA, Jowai, ma S. Phawa Secretary EPHPHATHA Society, ma E. Sapuh President EPHPHATHA Society.
Ha ba kren ka kong Passah ka ong ba ia kane ka sngi la ju rakhe ha shi tyllup ka pyrthei na ka bynta ban kyntiew ia ka hok jong ki briew kiba don jinglong kyrpang ha ki dkhotmet ne ha ki bor pyrkhat bad ruh ban ai ka jingpynsngewthuh na ka bynta ka jingbha jingmiat jong ki ha ka imlang ka sahlang. Ka iathuh ba ka tnad Social Welfare ka peit ia kum kine ki briew (PWDs) da kaba kyrshan ia ki ha kiba bun ki liang jong ka jingdonkam jong ki. Ka kyntu ruh ia kine ki briew ba kin pynrung kyrteng ialade ha u Aadhaar khnang ba kin ioh shibun ki skhim jingiarap na ka sorkar.
Ka kong M. War, Advocate kala kren halor ka phang ka Rights of Persons with Disabilities Act (RPWD), kaba kdew shai ia ka jingdonkam ban kyntiew, ban iada bad ban pynioh ia ka jingialong mar ryngkat ha khmat ka aiñ. Ka kong War kala pyntip ruh ba ka sorkar kala thung kyrpang ia u Public Prosecutor ne nongiasait na ka bynta kum kine ki briew hapoh ka District East Jaintia Hills.
Ha kane ka sngi la pynlong ruh ia ka Free Medical Health Check up na ka bynta kine ki PWDs kaba la pynlong da ka ophis District Medical and Health Officer, East Jaintia Hills District, Khliehriat.
La don ruh shibun ki prokram kiba pynphuh pynphieng ia kane ka sngi kum ka jingiakop rwai, iakop shad, ki games and sports na ka bynta jong ki.
