Rs.20 lak la mang ban maramot ia ka jingkieng doi-doi
Kum shi bynta ban rakhe ia ka jingdap ka jingioh jylla ba pura ka jylla Meghalaya bad ruh ka jingdap 75 snem jong ka jingioh laitluid jong ka ri India (Azadi ka Amrit Mahotsav) ka Department jong ka Arts & Culture, Department jong ka Sports & Youth Affairs, Meghalaya, Shillong ha ka jingiatreilang bad ka ophis Sub- Divisional Officer (Civil), Amlarem Sub- Division Amlarem bad ka Seng Samla Shnongpdeng Cultural & Sports la pynlong ia ka water sports festival ba shisngi ha Wah Umngot, Shnongpdeng kaba dei ka sien kaba nyngkong ba la pynlong ia kum kane ka prokram lehkmen.
Ha kane ka sngi u ma Lahkmen Rymbui MLA ka thain uba dei ruh u Home Minister ka sorkar jylla ula long u kongsan. Ha kane ka sngi la iadon lang ruh u Commissioner & Secretary of Arts and Culture Department, Government of Meghalaya u bah F. R Kharkongor, ka Secretary & Director jong ka tnad Information & Public Relations kong M. War Nongbri, u Assistant Director Sports & Youth Affairs bah P.B War Nongbri, u Sub- Divisional Officer (Civil), Amlarem Sub- Division Shri. Abhilash Bhandaral bad u Superintendent of Police u Shri. B. Marak.
Haba ai jingkren u ma Rymbui ia la iaroh shi katdei eh ia ka jinglah jong kitei ki tnad sorkar ban pynlong ia kum kane ka jinglehkmen ha Wah Umngot kaba don ha ki bynta jong ka shnong Shnongpdeng. U ong ba ka shnong Shnongpdeng bad ka wah Umngot kin donkam shu ban dang pynithuh sha ki nongjngohkai pyrthei namar ki long kiba la paw bha ha ka map jong ki kam jngohkai pyrthei ym tang hapoh ka jylla, ha hapoh ka ri India hynrei ha ka pyrthei hi baroh kawei. Kumta u ban jur ba ka long kaba donkam haduh katta katta ban wanrah ia ka jinglehkhuid bad u kyntu ia ki trai shnong ba kin don ia ka mynsiem ban pdiang sngewbha bad iarap kylliang ia ki nongwan jngohkai haba ki wankai ne sah sha kane ka jaka.
U ma Lahkmen u la kyntu ia ki paidbah ban long kiba iadon bynta lang bad ka sorkar haba ka don jingmut ban wanrah ia kino kino ki kam pynroi ha ki shnong ki thaw. Ula ong ba ka sorkar kala mang Rs.20 lak tyngka ban maramot ia ka jingkieng doi-doi kaba don ha kane ka shnong.
U bah F.R. Kharkongor ula ong ba ka jingthmu jong kane ka prokram ka long ban kyntiew ia ki kam jngohkai bad ki kam ialehkai Water Sports ha kine ki thaiñ. U khot ia ki nongshong shnong ban iatreilang bad ka sorkar na ka bynta ki kam pynroi ki ban sa pynioh hapoh ki shnong ki thaw.
Kham ha shwa u SDO (Civil) u Abhilash Bhandaral ula pdiang sngewbha ia baroh kiba la poi sha kane ka jinglehkmen.
Ki jingialehkai kiba la pynlong ha kane ka sngi ki kynthup ia ka Boating, Swimming, Water Polo, Boat Tableau presentation and Zip lining.
Ka la don ruh ka jingsam ia ki khusnam sha ki nongjop ha ki jingiakop ba pher ba pher da u kongsan.