Kyntu jur ka tnad ka koit ka khiah ia ki paidbah ban ai tika COVID-19
Ka tnad jong ka Koit ka Khiah jong ka Ri India (Ministry of Health and Family Welfare) kala ai ia ka kaiphot ba haduh mynta ka sngi (5.12.2021) ki dang don sa 21.13 klur (21,13,99,456) tylli ki dose tika COVID-19 kiba dang sah khlem pat lah ban pyndonkam ne ai injek sha ki paidbah ha ki jylla bad ki Union Teritory bapher bapher hapoh ka Ri India ia kiba ka sorkar India kala dep ban pynpoi sha kitei ki jylla naduh kine ki por bala dep.
Kumta na ka liang jong ka tnad ka koit ka khiah ka buh ka jingkyntu jur ia ki paidbah jong ka ri kiba la biang rta ba ki dei ban shim khia dalade ialade ban leit sha kito ki jaka ai tika ha ki shnong ki thaw jong ki, khnang ba kin lah ban pyndep ia kane ka jingai tika ialade ba kin ioh ka jingiada na kane ka jingpang kaba la sar ia ka ri bad ka pyrthei hi baroh kawei. Kaba ap jingma ka long ba une u khniang jingpang COVID-19 u lah ban kylla bad khlaiñ bor katba nangmih ki sngi ki por bad mynta la tip ruh ia u kum u jait khniang Omicron uba la lah ban pur stet bha, la pynpaw ki heh jong ka tnad.
Katkum ka jinglum jingkheiñ jong ka tnad ka Koit ka Khiah ba haduh mynta ka sngi ka sorkar kala dep ban pynpoi ia ki dawai tika haduh 138 klur dose (1,38,95,38,030) sha ki jylla bad Union Teritory bapher bapher.