Ka Seiñ Kur Dkhar Jaintia Hills, Wapung Circle ka la pynkup burom ia ki 27 ngut ki samla kiba la pass bha ha ki kyrdan jingpule bapher bapher ia kaba la tip kum ka “Excellence Award 2021 Ceremony”. Iaka jingialang pynkup burom la pynlong ha shnong Jalyiah, East Jaintia Hills ha ka jingiadonlang ki nongialam jong ka Seiñ kur Dkhar na East Jaintia bad West Jaintia Hills District ha kane ka sngi Saitjain (04 tarik bnai Nohprah 2021).
Ha kane ka sngi ka la don ruh ka jingshad tynrai na ki seiñ samla jong ka Khliehmyntriang, Jalyiah, Tuber Kmai shnong bad Wapungskur. Ka la don ruh ka jingshad tynrai na ki seiñ longkmie jong ar tylli kita na ka Pamra Kmai bad Wapung Shnong. Hashwa ka jingpynkup burom ka la don ka jingialang ba la pyniaid da u President ka Seiñ Kur Dkhar Wapung Circle ma Shaniahskhem Dkhar bad la ioh ia ki jingkren pdiang burom na I kong Rosila Dkhar na ka shnong Iongkaluh ba kynthup ia u Rangbah Shnong ka Jalyiah.
Ha katei ka sngi la ioh ruh ia ki kyntien sneng kyntien kraw ia ki khun samla jong ka kur na u ma Hamjhan Dkhar uba dei u General secretary jong seiñ kur Dkhar Central body ,bad u ma Teres Dkhar, u President ka Kur na East Jaintia bad kiwei kiwei. Baroh ki nongkren ki la ai ka jingïaroh ïa kine ki samla kiba la wanrah ka nam ka burom ïalade shimet, ia ka ïing ka sem bad ka kur Dkhar bad ki la ai ka jingkitbok kitrwiang bad ka jingkyrkhu kyrdoh ba kin nangkiew shaphrang ha ki jingpule puthi jong ki.
Ha kane ka juh ka sngi ka Seiñ Kur Dkhar ka la pynskhem ïa ka Jalyiah Khliehmyntriang Unit bad pynbam smai ïa ki dkhot nongkitkam na ka bynta ka samoi treikam jong u snem 2021- 2024 bad ïa ka jingpynbmai smai la shimti da ma Harwis C Dkhar u ba dei u Vice President jong ka seiñ kur Dkhar Central body.
Ki nongkitkam jong ka Kur Dkhar Jalyiah Khliehmyntriang Unit 2021-2024 1 ki long ma Hamklet Dkhar President, ma Emmon Dkhar. V/ President, ma Lamphrang Dkhar Secretary, ma Joining Dkhar Asst. Secretary, ma Wom Dkhar Treasurer, ma Market Dkhar Advicer bad ki dkhot kiba pyniasoh ki don haduh 53 ngut.
La ioh ruh ka jingkren na ma Justine Dkhar Ex-MLA , u la iathuh khana lyngkot “ba don uwei u samla uba biang ka kyrdan pule hynrei ula ngop pat ha ki jingdih buaid bad kane ka ialam ia u sha ka jingjot”. Kane ka iahap bad ka jingkren ki tymmen kaba ong kumne “ka jingsarong ka wan shuwa ka jingjot”bad ula kyntu bad sneng ia ki khun samla watla ki la biang ka jingnang jingstad hynrei kim dei ban klet ia ka akor ka burom bad ia ka jingsneng babha ba ki la ioh naduh ba ki dangrit ha iing. Ka dei ka jingtip ia ka akor ka burom kaba ialam sha kliar ki lum ula bynrap shuhshuh. Bad u la ong ruh ba kane ka seng kur ka dei kaba donkam tam ym don niam ha ka kur kaba lah ban pynpait ia ka jingiatip lem. Da ka jingdon kane ka seng kur Dkhar kan iarap shibun ia ki para kur kiba na jan ne jngai kiba don jingeh ba har rukom ban pynsngew ha ki rangbah kur ia ki jingeh jong ki.
La ioh ka jingkren ai khublei kyrpang na ma ma Phrancis Dkhar.
