Kum shi bynta ban iasnohktilang bad ka pyrthei baroh ka wei ban kynmaw burom ia ka sngi ba kyrpang jong ki briew ba don jingduna ha ki dkhot met, ka People’s Welfare And Development Society (PWDS) ha ryngkat ka jingiatreilang bad ka ophis jong ka District Social Welfare, West Jaintia Hills Jowai ki la rakhe ia ka International Day of Person With Disability 2021 kaba juh long man la ka 3rd December 2021. Ia kane ka prokram ruh la rakhe ha Shnong Mukhla, kaba hap hapoh ka Thadlaskein Block, West Jaintia Hills District. Ka phangpdeng jong kane ka jingrakhe ia kane sngi ba kyrpang jong ki briew ba don jingduna ha ki dkhot met mynta u snem ka long, “Leadership and participation of Person with Disability towards an inclusive, Accessible and Sustainable post Covid-19”.
La sdang ia kane ka sngi da ki jingialehkai bapher bapher ha ka por 10:00 baje mynstep bad la iashim bynta pura da palat 100 ngut ki briew baduna ha ki dkhot met kiba wan sha kane kasngi. Ha ka jingialehkai pynbthei balloon (Basting the balloon) la jop nyngkong da i Phidalin Manar, wan ba-ar i Elnathan Pariat bad ba-lai i Jonathan Pariat. Ha ka jingialehkai Knieh Shuki (Musical Chair) la jop nyngkong da i Michael Phawa, wan ba-Ar i Sahnam Suna bad ba-Lai i Kamnipaia Phawa bad ha ka jingialehkai Passing the Ball la ioh nyngkong i Suni Sumer, wan ba-Ar i Durka Sari bad ba-Lai i Sumarki- o Bhoi. Ha dein ki jingialehkai, la pynlong pat ia ka Health Check-up na ka bynta baroh kiba wan iashim bynta bad la ai ei ruh ia ki dawai sha kiba donkam da ki Doctors bad ki staff jong ka Ummulong Community Health Center.
Ha dein ba la dep ia ka Health Check-up, la pynlong ia ka program ban rakhe ia kane ka sngi, ia kaba la pyniaid da i bah Hachwa Suna (General Secretary ka Mukhla Raid Pyllun). La ioh ia ki jingkren pdiang burom na i kong N. Sutnga (U.D.A DSWO) bad i kong J. Synnah (District Social Welfare officer WJH) i la batai shai ia ka jingmut jong ka jinglehkmen ia kane ka sngi man la u snem bad i la batai shai ruh ia ki lad jingiarap (schemes) ba lah ban ioh na ka ophis jong ki. La ioh ia ka jingkren na i kong Durka Sari na Mukhla Nongrim, i ba la ai khublei bad sngewnguh ia ki nongpyniaid ba pynlong ia kane ka program bad kumjuh i la iatuh ruh ia ki jingeh ba i ia kynduh ha ka jingiaid lynti jong i kum i wei na kiba don jingduna ha ki dkhot met.
Ki wei pat kiba ia shim bynta ki long ka ophis jong ka District Legal Service Authority West Jaintia Hills, ha kaba la ioh jing kren na i Advocate L.S Ymbon i ba la batai shaphang ki aiñ ki ban iada ia ki briew ba don jingduna ha ki dkhot met bad kumjuh na ka District Rehabilitation Centre, Ialong Civil Hospital ha kaba la ioh jingkren na u Dr. P.M. Pyrtuh u ba dei ruh u Nodal Officer DRC u ba la batai shai shaphang ka jingdonkam ia ki UDID bad Certificate khang ban lah ban ioh ia ki jingmyntoi kiba bun.
La ioh ruh ia ka jingsam ia ki prize shaki nongjop ha ki jingialehkai bapher bapher bad ka jingaisngewbha shabaroh ki nongiashim bynta. La pynkut pat da ki kyntien aikhublei na u bah Mutshwa Thabah, President ka People Welfare And Development Society.