Ka Synjuk ki nonghikai Meghalaya Upper Primary School Teachers Association (MUPSTA) Garo Hills Region ka la pynlong ia ka General meeting ha ka 3 tarik December 2021 ha Rongram playground, Tura, West Garo Hills ha ka por 11.AM. bad da kawei ka jingmut ka seng ka la pynpaw ia ka jingsngewkhia ba ka sorkar ka la shu leh kuman ia ki jingeh jong ki nonghikai skul Upper Primary ki ba don kum ba 844 tylli.
Ha ka juh ka por, ka seng kam sngew iahap satia ia ka jingkren laplah jong u myntri ka tnad Education u bah Lahkmen Rymbui da ka ba shu ong beit syndon ba ka sorkar kam lah ban kyntiew kyrdan deficit ia baroh ki skul Adhoc Upper Promary ki ba don ha Meghalaya baroh kawei. Ha kane ka jingialang ka seng ka la iatai sani bha ia kane ka jingsngap mynthi jong ka sorkar ban ym leh eiei ia ki jingdawa ba shongnia jong ka seng.
Ka sorkar ka la shu kular thok la bunsien ban pyntrei kam noh ia ki jingdawa jong ka seng ban kyntiew deficit noh hynrei mynta la saw snem ka khlem leh eiei pat. Kumta ka seng da kawei ka jingmut ka la shim ia ka rai ban pynlong da ki jingiakhih ki ba tyngeh tad haduh ban ka sorkar kan shah shkor lem ia ki jingeh jong ki, iathuh u Mr. Senendro R Marak, Vice President MUPSTA Central Body & President MUPSTA Garo Hills Region.