Ka kynhun jong ki nongtrei Pulit ka 6th Battalion Meghalaya Police bad ka Meghalaya Police Academy/ Police Training School Umran, kum shi bynta ban rakhe ia ka jinglehkmen Christmas kala pynlong ia ka jingsam da ka ki jaiñ syaid sha kito ki long ïing kiba duk ba kyrduh kiba don ha ka shnong Umran Niangbyrnai, Ri Bhoi District.
Ia kane ka prokram la pynlong ha ka 6 tarik mynta u bnai ha shnong Umran. Ha katei ka sngi la iadonlang u Commandant jong ka 6th Battalion Meghalaya Police u bah Lakador Syiem MPS. Kala don ruh ka jingkren lyngkot shaphang ka khubor ka Christmas.
Ha katei ka sngi la sam ia ki jaiñ syaid kiba kynthup ia ki jaiñ kup thiah (Blanket) sha ki briew kiba donkam shisha ban ioh ia kine ki jingiarap ha kum kane ka aiom khriat jong ka Tlang.
Kane ka jingsam ia kine ki jaiñ kan dang bteng nangne shakhmat kum ka jingleit sam sha ki jaka ri Khunswet, ki jaka sah ki riew tymmen kiba don ha Ri Bhoi District.
Kala don ruh ka prokram ai jinghikai na ka liang koit ka khiah bad ka Behavioral Change kaba pynsngewthuh ia ki paidbah shaphang ka jingdonkam ban shim ia ka tika iada COVID-19.
Na ka liang jong ki nongpyniaid ki pynpaw ka jingsngewnguh ia baroh ki Pulit ka Meghalaya bad kiwei pat ki riew kylluid mynsiew kiba la noh synniang ban pynlong ia kane ka prokram kaba jop.
