Ka seng Hynniewtrep Integrated Territorial Organization (HITO), Jaintia Hills District hapoh ka Jingialam u Joint Secretary u samla Crisene Ksoo bad u Sports Secretary u samla Pynhun Chullet ha ka 7 tarik Nohprah 2021 kila ai daka dorkhas ha u District Medical and Health Officer DMHO ka West Jaintia Hills District ban pan jingshai halor ka jingpynslem ban khot ia ka interview na ka bynta ki 17 tylli ki post ANM ka ba la khot ha ka 6 tarik August 2020.
Naka liang ka seng kala pynpaw ia ka jingsnewbynniaw halor kane ka kam namar dang bun ki CHC’s, PHC’s, bad Sub-Centre kiba dang duna ki nongtrei ka tnad ka koit ka khiah khamtam ki ANM bad dei halor kane ka nongrim ka seng kala leit ban pan jingshai syndon na u DMHO ban pynshai iakane ka kam.
Haka jingiakren bad ki nongialam jong ka seng u DMHO u la ong ba ka jingpynslem ban khot ia ka interview kadei halor ka nongrim ba ka Department ka dang bishar bniah ia ki kot ki sla jong ki kandidate ki ba la apply namar katkum ka advertisement la khot tang ia ki ANM hynrei kiba wan ban apply pat kiba bun ki dei ki BSC bad MSC nursing te dei na kane ka daw ka shim por ban khot ia ka interview bad ula kular ruh ban khot noh ia ka interview ha ka taiew ba nyngkong jong u kyllalyngkot 2022.