Ka Thadlaskeiñ Turmeric Processing Unit (TTPU) ka jaka kaba la shna kyrpang na ka bynta ban buh ia ki Shynrai kiba mih ha kane ka thaiñ West Jaiñtia Hills District. Mynta ka sngi na ka liang u bah Banteidor Lyngdoh u ba long u Minister of Agriculture and Farmers Welfare, u la wan aiti ïa kane ka Unit sha ka Company kaba la tip kum ka West Jaiñtia Hills Farmer Producer Company Ltd (WJHFPC ) ka ban shimti thymmai ïa katei ka jaka ban pynïaid nangne sha khmat.
La pynïaid ïa ka prokram aiti ïa katei ka Processing Unit da ka kong R.K Blah kaba long ka District Horticulture West Jaiñtia Hills District. Ha ka jingïadon lang u shri K.N. Kumar, IAS (retired) Chairman Meghalaya Farmer (Empowerment) Commission, u Shri. D. Sathiyan IFS Secretary Spice Board of India, ka kong S.E.Kynjing Assistant Director of Agriculture West Jaiñtia Hills District, ka kong K. Swer Secretary Marketing Board Meghalaya State Agriculture Marketing Board ha ryngkat ki nongrep na ki shnong bapher bapher.
Na ka liang u Minister u la ong ba ïa ka Thadlaskeiñ Turmeric Processing Unit la dep ban mang pisa lyngba ka skim RKBY hynrei ym shym lah ban pyntreikam ïa ka na ki katto katne ki daw. Hynrei ha u snem 2018 pat ha ryngkat ka jingïatreilang la aiti ïa katei ka Unit sha ki riew shimet ban pynïaid ïa katei ka Unit. U la ong ruh ba da ka jingtrei shitom jong ki nongrep mynta la lah ban pynïaid ïa u Shynrai Lakadong wat shaduh shabar ka ri India. U la ban jur ruh ïa ki nongrep ba ki dei ban wan sha ki traning kiba bapher bapher khnang ba ki nang kiew shaphrang ha ki kam rep kam riang.
Kum ban shu pynkynmaw ba ïa ka Processing Unit kaba don ha Thadlaskeiñ la shna kyrpang ban pynsuk ïa ki nongrep Shynrai Lakadong ba kin wan buh ïa ki mar ki jong ki na ka bynta ban pynïaid ïew ïa ki, ha katei ka Unit mynta la don kumba 600 ngut ki nongrep kiba la dep ban register ïalade bad kumba 300 ki dei ki member. Kane ka long ka jingai mynsiem shuh shuh ïa ki nongrep ba kin nang lah ban pyniar shuh shuh ha ka rep Shynrai Lakadong kaba la bna nam ha kylleng ka pyrthei.
Ia ki kyntien ai khublei la ai da u bah D.Lyngdoh Horticulture Development Officer ka West Jaiñtia Hills District.