Mynta ka sngi ka 9 tarik u bnai Nohprah 2021 ka Federation of Khasi Jaiñtia and Garo People (FKJGP) War Jaiñtia Circle hapoh ka jingïalam u President jong ka seng u samla Banshlur Mukhim, Assistant General Secretary u samla K. Khonglah, ka la leit ban ïakynduh ïa i District School Education Officer (DSEO) ka West Jaiñtia Hills District i kong A.P.Syiem ban dawa na ka tnad pule puthi ban maramot lane ban wanrah syndon da ka building kaba thymmai ïa ka L.P. Government School kaba don ka shnong Padu Bah.
Ha katei ka jingleit ïa kynduh na ka liang ka seng ka la ïoh ban pynsngew ha i DSEO halor katei ka ïing skul ka ba la jot rakthai, kaba la buh jingeh ïa ki khynnah skul bad ïa ki nonghikai ruh kumjuh. Na ka liang u President ka FKGJP War jaiñtia Circle u samla Banshlur Mukhim u la ïathuh ba na ka liang jong ka seng hadien ba ka la ïoh ïa ka jingujor na ki nongïalam skul bad ki nonghikai jong katei ka skul kumta na ka liang jong ka seng kan banse khlem da leit ban tuklar lang ïa katei ka kam khnang ba kan lah biang ban ai ka jingshngaiñ bad ka jingsuk khamtam ïa ki khynnah skul.
Na ka liang jong ka seng ka la pynpaw ka jingsngewsih kaba khraw halor ka jingjot rathai jong katei ka ïing skul naduh ki tin sop ki dieng bad ki kynroh kiba la sniew lut. Kane kadei ruh ka skul kaba la rim bha ka bym duna shuh ïa ka 65 snem haduh mynta. Kumban shu pynkynmaw ba ïa katei ka ïing skul la ju pynlong ïa ka kum ka Polling Station ha ka por Election hynrei mynta la hap ban pynkynriah noh shawei namar ba kam long shuh ban pyndonkam.
Kumta ka seng ka la kyrpad jur ïa ka tnad pule puthi ba kan shim khia lem ïa kane ka kam ban wanrah da ka ïing skul kaba thymmai ban suk ki khynnah skul bad ki nonghikai. Na ka liang jong i kong A.P.Syiem DSEO i la kular ba in shim khia halor katei ka kam ban wanrah da ka ïing skul kaba thymmai hapoh katei ka shnong.