Ka shong Pamtadong Shnong ka dei ka shnong kaba hap hapoh u pud u sam jong ka Amlarem Block Sub-Division, kaba jngai tang kumba 4 Km na Amlarem, mynta ka hap ban mad ïa ka jingeh kaba khraw namar ba u Transformer uba don ha katei ka shnong u la duh naduh u snem 2013.
Kumta ha kaba ïadei bad kane na ka liang jong ka FKJGP War Jaiñtia Circle hadien ba ka la ïohi ïa ka jingeh jong katei ka shnong kaba la shu shong dum baroh shi katta, mynta ka sngi ka seng ka la leit ban ïa kynduh ïa u Executive Engineer ka MePDCL West Jaiñtia Hills District Jowai, ban dawa pynïoh light ïa katei ka shnong bad ban sngewthuh shai na ka daw aiu ba katei ka shnong ka duh light.
Ha ba ïakren bad u Engineer jong ka MePDCL u la ong ba ka pynlyngngoh shi katdei eh namar ha baroh shi katta ki snem ba la leit ym don ba wan ujor hapoh ka ophis. Wat la katta ruh na ka liang jong ka ophis ka la kular ba kan shimkhia ïa katei ka kam ban pynbeit na kaei ka daw ba katei ka shnong ka duh light.