U Symbud Myntri Rangbah ka jylla Meghalaya, u bah Sniawbhalang Dhar, ha ka 19 tarik July 2024 u la hiar dalade ban jurip ia ka jingpyntrei ia ka surok na Ummulong – Tyrshang – Bamkamar kaba ha ka jingjngai kumba 22 kilometres. Ha kane ka sngi, la synran lang ia u symbud myntri rangbah da u Engineer u bah Y. Shangpliang, u SDO ka PWD Jowai Central Division u bah O. Thubru, ki JEs, ha ryngkat ki Waheh Shnong bad ki riew rangbah jong ki shnong kiba iaid lyngba une u surok.
Ia kane ka surok la sdang pyntrei naduh u snem 2022 bad kaba la buh thong ban pyndep haduh u snem 2025, kaba la ban pynlut haduh 42 klur tam tyngka. Katkum ka jingjurip mynta ka sngi, la lap ba ka jingpyntrei ia kane ka surok ladep kumba 90 percent.
Ha ka jingjurip, u Symbud Myntri Rangbah u la kyrpad ia ki officer jong ka Department ban shimkhia ban bud dien bad ban peit bniah bha ia ka kam, khnang ba kane ka jingpyntrei ia kane ka surok kan long kaba iaid beit katkum ba la thmu.
