U Symbud Myntri Rangbah jong ka sorkar jylla u ma Sniawbhalang Dhar mynta ka sngi Saitjaiñ, ula pynhap pyrda ïaka lympung ïalehkai phainal ka “12th Mawryngkneng Greater Football League 2023-2024” jong ka kyrdan 1st Division bala pynïaid da ka Mawryngkneng Cultural & Sports Club, East Khasi Hills District.
Ha kane ka sngi u ma Sniawbhalang Dhar u la long u kongsan ha ryngkat ka jingiadonlang u President ka Club bah Kesmanful Nongpluh, Secretary ma Shiningstar Kharbihkhiew, u Sordar Shong Mawlyngngad bah Elias Kharbihkhiew, u Sordar shnong Mawryngkneng bah Peter Lawaim ki nongïalam shnong, ki dkhot ka Mawryngkneng Cultural Sport Club nalor kiwei de kiba la shah khot sngewbha.
Na ka liang u ma Sniawbhalang Dhar ha ka jingkren ula ai khublei kyrpang ïa baroh naduh ki bor pynïaid jong kane ka lympung bad khamtam ïa ki ar tylli ki kynhun kiba la poi sha ka jingïakhun Final, ula ong ka jingpynlong ïa kum kine ki jait jingïalehkai phutbol kan dang ai mynsiem shuh shuh ïa ki samla ïalehkai jong ka shnong.
Ula pynsngew ba ka kam ïalehkai phutbol mynta ka long kawei na ki lad ïohkam ïohjam, kumba long lem ki rangïalehkai sha kiwei pat ki Ri jong ka pyrthei, ula kyntu ïa ki nongïalehkai ba kin don ka mynsiem ïaleh khang ban ïoh ïa ka jingjop. Shuh shuh ula ong ha ka jingïakhun ki don kiba jop bad kiba rem hynrei ka mynsiem ïalehkai ka dei ban don ha ka jingim
Ha ka juh ka por ula ai ka jingkitbok kitrwiang ïa kane ka Club ba kan dang ïaid shakhmat ha ki kam ba bha ban kyntiew ïa ka sap ka phong jong ki khun samla bad na ka liang jong u ruh u kloi ban ïarap ïa ki jingdonkam ka Club.
Ha kane ka sngi la pynphuh pynphieng shuh shuh ïa kane ka jingïakhun phaibal da ki jingshad Drill bala shim bynta da ki khynnal Skul ka RMSA, na ka Mawryngkneng Higher Secondary Scholl bad ka Meghalaya Home Guard Pipe Band, la ïoh ruh ka jingrwai na i Arlene Iawphniaw.
Ha kane ka jingïalehkai phainal ïaka nam lahduh la ïoh rah da ka Nongdawah kaba la pynliem da 2-0 ïa ka Pdengshnong.
