U Myntri ka tnad kam Pohiing kumjuh ka tnat Pule Puthi u bah Lahkmen Rymbui uba dei u MLA ka 7 Amalrem Constituency, ha ryngkat ka jingia donlang u Additional Chief Secretary, u bah D.P Wahlang, u ma C.H Challam Chief Engineer ka PHE bad kiwei pat, mynta ka sngi u la wan ban plie paidbah ia ka Mustem Water Supply Schemeha ka shnong Mustem, West Jaintia Hills District ka ba shongdor haduh T. 9 klur tam.
Ha kane ka sngi plie ia katei ka Water Supply Scheme la pyniaid ia ka jingilang bad ai ka jingkren pdiang da u Waheh shnong ka shnong Mustem u ma H. Shylla.
Ha ba ai jingkren ha katei ka sngi na ka liang u bah D.P Wahlang u la ong ba ia katei ka skim la ioh lyngba ka NABARD u pynpaw ruh ka jingsngew kmen namar la lah ban pyndep ha ka por kaba biang kata tang hapoh 10 bnai. U la ong ruh kane ka long ka jingmyntoi ia ki paitbah nongshong shnong ha kaba lyngba kane ka skim mynta haduh kumba 472 tylli ki longiing ki la ioh ban pyndonkam ia kane ka um lyngba kane ka skim. U la pynshai ruh ha ka jingshisha hapoh ka Skim RIDF kiba kynthup ia ki top um bad ki public tap hynrei pat lyngba kane ka skim ka long ka jingkyrkhu ia ka shnong ka thaw bad ia ki pait nongshong shnong hi ruh kumjuh namar kumba 500 litar ka um kin ioh ha ka shi sngi lyngba kane ka skim.
Na ka liang u ma Lahkmen Rymbui ha ba ai jingkren u la ong ba ka jinglah ban pyndep kloi ia katei ka skim ka dei lyngba ka jingtrei shitom lang hapdeng ka shnong, ki contractor bad ka tnad PHE, u bah Rymbui u la pynpaw ia ka jingsngew kmen ha kaba u la ong ba ka hapoh kine ki 50 snem kiba la leit noh ka sorkar ka lah ban pyndep ia shibun kiei kiei ha ka ban shakri ia u paitbah hapoh ka jylla, naduh ki skul bad ki skim bapher bapher.
U ma Rymbui u la pynshlur ruh ia ka shnong ba kan phai khmat sha ki kam jngohkai pyrthei khamtam kaba don hapoh ka shnong Mustem, u la kular ruh ba shen yn sa shna pynbha ia u surok naduh ka shnong Chyrmang haduh ka shnong Iongnoh haduh ban poi sha Mustem khnang ba kan pynsuk ia ki nong wan jngoh kai pyrthei bad kan long ruh ka jingmyntoi ia ki samla ka shnong ba kin ioh kam ioh jam. U la kyntu ruh ia ki paitbah ba ki dei ban sumar bha ia ki pipe um ki top um bad ban leh khuid leh suba.
La pynphuh pynphieng shuh shuh ia katei ka program ha katei ka sngi da ki sur jingrwai ki khun samla jong ka shnong Mustem.