Da kaba bteng ia ka jingrakhe ia ka World Hepatitis Week 2024, ka ophis jong ka District Medical & Health Officer (DM&HO) East Jaiñtia Hills District ha ka sngi thohdieng ka la pynlong ia ka prokram ban rakhe ia kane ka sngi ha Lad Rymbai, East Jaiñtia Hills District.
Ha kane ka prokram la ïashim bynta da i District Immunization Officer, East Jaiñtia Hills District, i Dr. N. P. Suchiang, u Medical Officer in-charge jong ka Opioid Substitution Therapy (OST) Centre, Khliehriat Dr. J Nongtdu bad katto katne ngut kiwei pat.
Haba ai jingkren ha katei ka jingialang, i Dr N. P. Suchiang u la ong ba ia kane ka prokram la pynlong ban pynsngewthuh ia ki briew halor ka jingsniew jong u khniang jingpang hepatitis ha ka met u briew bad ki lad ki lynti kiba ki briew ki lah ban leh ban iada na ka jingsaphriang jong une u khniang jingpang khamtam eh u Hepatitis B & Hepatitis C.
Katba u Medical Officer ba peit ia ka Opioid Substitution Therapy (OST) Centre, Khliehriat Dr. J Nongtdu ha ka jingkren jong u, u la kren halor ki lad ki lynti ha kaba ka jingpang hepatitis ka lah ban rung ha ka met u briew katba u la pynpaw ruh ia ka jingktah jong une u khniang jingpang ha ka met khamtam eh ha ka sniehdoh.
Ha kane ka prokram la pyntip da ki bor ka tnad ka koit ka khiah ba yn sa ai tika na ka bynta ban ïada na ka jingpang Hepatitis ha Opioid Substitution Therapy (OST) Centre, Khliehriat ha ka 30 tarik Nailar, 2024.
