La ai jingthoh lyngba u DC ka West Jaintia Hills
Ka Jaintia Youth Federation (CB) hadien ba ka la ioh ia ka jingud jingnam na ki paidbah ka rilum Jaintia halor ka jingbym don cement shuh hapoh district, mynta ka sngi kala phah ia ka memorandum sha u Minister I/C Industries and Commerce, u ma Sniawbhalang Dhar lyngba u Deputy Commissioner West Jaintia Hills District, ma Garod L. S. N. Dykes, ban pynsngew sha u halor kane ka jingeh ba ki paidbah nongshong shnong ki ia kynduh.
Ha ka shithi bala phah da u General Secretary ka seng u S. Pajuh, ka seng kala dawa na u myntri ban tuklar kloi halor kane khnang ba ki briew kiba trei bad im ja da ki kam kiba pyndonkam da ki cement naduh ki trai truck, ki nongkhaïi bad nongdie dukan bad khamtam eh ki mistery (labour force) kin ym shah ktah palat tang namar ka jingbym pynpoi thikna ia ka cement ha ka por ka ba biang khamtam ha kum kine ki por kiba ka sorkar ka hap ban pynjari ia ka lockdown na ka por sha ka por la ar snem mynta.
Ka seng ka kyntu jur ia u myntri sorkar ba dei peit ia kane ka kam bad ia ka sorkar MDA, ia ki local MLA kane ka thaiñ ba kin sngewbha ban shim ia ka jingkitkhlieh ban tuklar ban pynbeit kloi ia kane ka jingeh kaba la jia namar ba don ka indefinite strike ba la khot da ka seng JHTOA.
Ka seng ka kyntu jur ia ka sorkar ba kan phah ia ki kharkhana pynmih dew bilat hapoh East Jaintia Hills District ba kin wan sha ka meij jingiasngewthuh bad kane ka seng khnang ba yn lah ban weng ia baroh kine ki jingeh.
Shuh shuh ka seng ka ai ruh ka jingkyrshan ba pura ia ka JHTOA halor ki jongdawa jong ka.