Mynta ka sngi u MP jong ka Lok Sabha u ma Vincent H Pala ula wan sha ka shnong Madankynsaw-Mowkyndeng na ka bynta ban plie ia ka Madankynsaw Premier League Season 3 Football Tournament.
Ha kane ka sngi la iadonlang u ma Victor Suja Waheh Shnong u ma Danny Shadap Secretary Shnong ma Bud Rimanki Chympa bad kiwei ki nongialam jong ka seng Womens Group & Handicraft Multi Purpose Co-operative Society, ïein tylli Village Organisation, MUSCC, ki Executive Member jong ka shnong bad kiwei de ki riew rangbah.
Haba kren ha ka jingialang u ma Vincent ula ai ia ki kyntien sneng kyntien kraw kumjuh ka jingpynshlur ia ki nongshong shnong ha ka liang ka kam ialehkai sport khamtam ruh ha ka liang ka Football. Ula iaroh ruh ia ki nongshong shnong ka Madankynsaw Mowkyndeng kiba la trei shitom ban pynjop ia u kum u MP. Na ka liang u ma Pala u kular ruh ban pynshna Mini Stadium hapoh katei ka shnong.
Kham ha shwa ban plie ia kane ka Tournament na ka liang u ma Vincent H Pala ryngkat bad ki nongialam shnong kila leit ban jurip ia ka Madan Shyiap na ka bynta ban shna ia ka Mini Stadium ha katei ka shnong, khnang ba yn lah shuh shuh ban kyntiew ia ki kam sport hapoh kane ka shnong bad ka thaiñ hi baroh kawei.
Na ka liang u MP ula leit jurip ruh ia ka Farmers Development Center (FDC) kaba la shu dep plie shen da u Myntri ka Rep ka Riang jong ka sorkar jylla ha kine ki khyndiat sngi.
La wan ban pynshongshit ia kane ka prokram da ka jingiadonlang ki nongjop jong ka Madankynsaw Got Talent Season 1bad ki Longkmie jong ka Village Organisation.
Na ka liang ka ophis jong ka Dorbar Shnong ka pynpaw ka jingsngew nguh ia u ma Vincent uba la shimkhia ban wan sha kane ka shnong ban plei ia katei ka Tournament bad ruh halor ka jingkular jong u ban shna ia katei ka Mini Stadium.
