Ka Shillong Lajong FC kaba dei ruh ka klob kaba nyngkong ban ioh mih khmat ia ka jylla ha ka lympung Durand Cup ka la khur ia ka jingjop ha ka jingïakhun ha la ïing (home match) ha kaba ka la lah ban pynliem ia ka klob shipai kaba na Nepal, ka Tribhuvan FC da 1-0 kol.
Ha katei ka jingïakhun ka Lajong ka la ïoh ban thep ia ka shi kol lyngba u Wadajied Ryngkhlem ha ka minit ba 6. Ka jingiakhun ka long kaba shongshit namar ka jingbun ki nongkyrshan bad ka Lajong ka la kham ïoh shibun ki kabu ban pynkhih jar hynrei na ka jingtbit ki rangialehkai ‘dien ka Tribhuvan ka Lajong ka la ïoh tang shi kol ha kane ka sngi.
Ka long ka jingkmen bad ka jingsngewsarong na ka bynta ka jylla ban ioh pdiang (host) ia kane ka lympung kaba la ioh ia ka jingithuh ha ka pyrthei. Lah ban iohi ia ka jingthrang jong ki paidbah ban ïoh sakhi ia kane ka jingialehkai ha kaba naduh ka por 11 baje mynstep ka jaka ieng kali (parking lot) bad ka madan polo ka la dap smam da u paid ieid phutbol.
Ka jingiasnoh kti lang jong ka sorkar jylla naduh ba la ioh ia ka jingtip ba ka jylla Meghalaya kan sa pdiang ia kane ka lympung ba heh, ka la long ka jingkyrkhu kaba khraw na ka bynta ki nongialehkai bad baroh ki nongkyrshan ba radbah ka Shillong Lajong FC.
La sakhi ruh ia ka jingiphuh iphieng ha ka rukom pynkhreh na ka bynta ka jingplie ia kane ka lympung (opening ceremony). Ha kane ka sngi la wan ban don ryngkat ruh u Myntri Rangbah ka jylla u Conrad K. Sangma, Myntri ba khmih ia ka kam ïalehkai, u Bah Shakliar Warjri, u symbud Myntri Rangbah Bah Prestone Tynsong, Bah Banteidor Lyngdoh bad kiwei kiwei.
Ka Lajong kan bteng biang ia ka jingiakhun ha la ïing pyrshah ïa ka Hyderabad FC ha ka 10 tarik mynta u bnai ha ka por 4 baje janmiet.
