Lah ban ong ba u snem 2024 u dei u snem jong ka ri Spain. Tang hadien shi bnai ba ki la ioh ban rah ia ka nam lahduh jong ka lympung Euro Cup, kane ka kynhun phutbol ka la ioh ban rah sa kawei pat ka nam, kata da ka jingjop phainal da 5-3 pyrshah ia ka France kaba dei ruh ka ri ba pynlong ne pdiang (host) ia ka Olympic mynta u snem.
Haba phai ha katei ka jingialehkai, ka France ka la ioh ban thep kol nyngkong lyngba u Enzo Millot ha ka minit ba 11 hynrei katba ka jingïakhun ka dang iaid ka Spain ka la ioh ban pynphai tang ha ka minit ba 18 lyngba u Lopez.
U Lopez u la pynskhem shuh shuh ia ka nongrim ïalehkai da kaba thep sa shi kol ha ka minit ba 25 bad tang hadien 3 minit ka Spain ka la ïoh 3 kol lyngba u Baena. Ka jingiakhun ha ka kylla step ka la kut noh da 3-1.
Hadien ka kylla step, ka rukom ialehkai jong ka France ka la pher bad la sakhi ba tang hapoh 20 minit ka jingïakhun ka la iakhaid kata da 3-3. Na ka jingïoh extra time, ka Spain ka la ioh kabu ban pynliem ia ka France ha kaba kibla thep 2 kol na ki 30 minit.
Lyngba ki 5 kol ka Spain ka la ioh ban rah ia ka nam lahduh ha ka liang jong ki shynrang.
Na ka jingkhein kyllum ha ka jingïoh takma, ka China ka don ha ka kyrdan ba nyngkong kynthup 32 tylli ki takma ksiar, ka US ka don ha ka kyrdan ba 2 kynthup 30 tylli ki takma ksiar bad ka Australia ka don ha ka kyrdan ba 3 kynthup 18 tylli ki takma ksiar katba ka India ka khlem pat ioh takma ksiar haduh mynta hynrei tang kawei ka takma rupa bad 5 tylli ki takma rnong.
Lah ban ong ruh ba kane ka dei ka snem ba sniew tam na ka bynta ka India namar haduh mynta ki khlem pat ioh takma ksiar.