U Symbud Myntri Rangbah ka jylla u Bah Prestone Tynsong mynta ka 10 tarik Nailar 2024 u la plie paitbah ïa u Durmot ba Shirynieng jong u Rev JJM Nicols Roy ïa u ba la ñiew kum u kpa ka Six Schedule.
Ia utei u mot sah kynmaw la tei ha Phyllaw ka Lariti International for Performing Arts & Culture Shillong. Ha kane ka sngi plie ïa u Motdur u Rev JJM la wan ban sakhi lang da ki MDC ki 10 tylli ki Autonomous District Council ka thaiñ shatei lam mihngi ka Ri India ba kynthup u Bah Paul Lyngdoh u Myntri ka tnad Arts & Culture ka sorkar jylla, u CEM ka KHADC u bah Pyniaid Sing Syiem, ki Syiem, ki Sordar bad kiwei kiwei.
Ha ba ai jingkren kum u kongsan u bah Prestone Tynsong u la ong, ka Meghalaya ka tip ïa u Rev JJM Nichols Roy kum u kpa ka Six Scheduled. u la ong, ngi dei ban Sngewsarong ba kum u nongpynwandur ïa ka Six Scheduled, ka Meghalaya ka long kumne kumba ka long mynta, ka dei lyngba ka jingdon ka Six Scheduled. U la pynkynmaw ha kine ki khyndiat snem ba la leit noh ka Sorkar India ka la pyntreikam ïa ka CAA bad ka Meghalaya ka la lait na kane ka aiñ da ka jingdon jong ka Six scheduled.
U Bah Tynsong u la ong, ngi dei ban ai jingïaroh ïa u Rev JJM, ïa ka ïing ka sem jong u, ka Balang U Blei ka ba la pynmih ïa u Rev JJM u ba la noh synniang shikatdei eh. U kyrmen ba kane ka sngi kan long ka sngi basah kynmaw pateng la pateng ha ka History jong ka jylla kumjuh ruh ha ka History jong ka Six Schedule ka Ri India.
