Ia ka seng samla Catholic Parish Jowai la seng ha ka snem 1984 bad ha kane ka snem 2024, ka la dap 40 snem kynthih. Ha kane ka jingdap 40 snem, ka la rakhe ia ka Ruby Jubilee jong ka hynne ka sngi 11-08-2024, ha mynshem ïingskul ka Marianhill Higher Secondary School, Jowai ha kaba u Rt. Rev. Bishop Ferdinand Dkhar, DD, Bishop ka Jowai Disocese u long u kongsan.
Kum ka dak ka jingsngewnguh bad ainguh ia U Blei uba la don ryngkat bad ka Seng Samla ha kine ki 40 snem kiba la leitnoh ha ka por 10:00 baje mynstep la don ka jingkñia Mas-bakhuid (Solemn High Mas) kaba lamkhmat da u Bishop Ferdinand ha ryngkat ka jingsynran lang ki Lyngdoh Sohblei (Phadar) jong ka Jowai Parish bad kiwei de ki Lyngdoh Shohblei kiba wan na kiwei de ki Parish ka Jowai Diocese.
Wat hapdeng ka jingpynwit jong u slap, da ki spah ngut ki khun samla jong ka Parish Jowai kila ia wan ban ia kmen lang ha kane ka Ruby Jubilee jong ka seng bad iashim bynta ha ka iabam iasip ia u kpu u Rynsi uba long ka met bad ka snam jong u Trai Jisu Khrist.
U Rt. Rev. Bishop Ferdinand DD, ha ka jingkren sneng, kren kraw ia ki samla u ong “Ko samla ba ieid nga dap da ka jingkmen kaba khraw bad nga ainguh ia u Blei na ka bynta ki jingkyrkhu bad ki jingaiei ba U Blei u la ai ha phi ki khun samla ha kine ki 40 snem kiba la leit noh. Wat khuslai hynrei kyrmen bad shaniah ha u Blei ba un nang kyrkhu kyrdoh ba phin long ki khun samla kiba skhem ha ka jingngeit, kiba riewblei kiba imbha im miat hapoh ka Balang, ha ka imlang ka sahlang bad kiba tei ia ka ri bad ka jaitbynriew ba kan nangkiew ha baroh ki liang jong ka longbriew manbriew”.
U Bishop Ferdinand ula pynskhem shuh shuh ia ka jingkren jong u da kaba shim na ki kyntien ka jingthoh bakhuid Isaiah- 40:31 kaba ong “Jar kiba kyrmen ha u Trai kin ioh bor thymmai ha ka jingim kaba mareh hynrei kin ym thait”
Nangta u Bishop Ferdinand u ong kum ki samla Khristan phi long ki nongbud jong u Jisu bad phi dei ban long kum ki Elijah uba leit jingleit sha lum Horeb ban ia kynduh ia u Blei. Haoid ka lynti kaba jngai kaba jynjar, ki jingartatien, ki jingsngewthylli bad hateng hateng phin jah lynti bad phin kylli halade balei ban im ha kane ka pyrthei jynjar, hynrei wat tieng ia ki jingeh. Ban jop ia ki jingeh ngi donkam ban duwai, namar kata ko samla baieit to long kiba duwai, duwai lang ha ki jingiaseng, ha ka por Mas, ha ka por jingkyrkhu, duwai lang ha ïing ha sem, hala marwei bad lyngba ka jingduwai phin sa jop ia ki jingeh ha ka jingim jong phi,ban shuh shuh u Bishop Ferdinand.
U Bishop Ferdinand ha ka jingkren jong u da kaba ai khublei Ruby Jubilee basuk bakmen ia baroh ki khun samla ka Parish Jowai, ha kajuh ka por u ai khublei Happy National Youth Sunday ia ki khun jong ka balang ha shityllup ka ri India. U Bishop Ferdinand u pynkut ia ka jingkren jong u da kaba kyntu ia ki khun samla ba kin kiar na ka jingdom riang, ka khong khong, ki ktien khor, ki jingmut ba sniew, ki jingthatrong bad long kiba sbun mar kylliang, kiba sngewlem bad kiba iamap iwei ia iwei kumba U Blei ula map ia ngi ha U Khrist.
