U Lat ka Jylla u Shri C.H Vijayashankar ha ryngkat ka jingiadonlang u Myntri C&RD u Shri A.T Mondal mynta ka sngi ka 13 tarik Nailar 2024 u la plie Paidbah ia ka jingialap “Har Ghar Tiranga” ha Raj Bhavan, Shillong ryngkat ki Heh Ophisar, Ki Heh Pulit, ki NCC, bad kiwei kiwei.
Haba ai jingkren ha kane ka jingialap plie paidbah ia ka Har Ghar Tiranga, u Lat u la pynpaw ia ka jingkmen ban iashim bynta ha kane ka jingpyllait paidbah, da kaba ban jur ia ka thong jong kane ka prokram ka long ban pynieng ia ka Lama Ri ha man la ki thliew iing, kumba la thmu da u Myntri Rangbahduh ka ri u Narendra Modi.
U la pynpaw ia ka jingdonkam jong kane ka jingialap, kaba kyntiew ia ka jingieid ri bad ka jingiatylli. Ia kane la sdang ha ka jingdap 75 snem ka jingioh laitluid jong ka ri India, ha kaba pynroi ia ka jingsngew sarong Jaidbynriew bad pynshlur ia ka jingieid ri.
U Lat u la kubur ruh ïa ki jingnoh synñiang jong ka Meghalaya sha ka jingïaleh laitluid jong ka ri India da kaba kdew ïa ki nongïaleh laitluid ba pawnam jong ka Jylla kum U Tirot Sing, u Kiang Nangbah, bad u Pa Togan Sangma.
Ha kane ka jingïalang la kynthup ïa ka jingsam ïa ki lama ri bad ka jingpyllait paidbah ïa ki ar tylli ki kot ba la pynmih da ka Tnad Arts and Culture, “U Tirot Sing” bad “Ki dohnud shlur bad ki nongïaleh laitluid na ki lum.”
