– Rai ban iai bud dien ia ki jingdawa ba dang sahteng-
Ka Jaintia Students Movement (JSM) ka la ioh ban pynlong ia ka Dorbar bah jong ka ne ka VIII-Annual General Meeting ia ka ba la pynlong ha shnong Khliehmyntriang East Jaintia Hills District hynnin ka sngi.
Ha kane ka Dorbar bah jong ka seng la ioh shibun ki mat jingiakren kiba la iatai sani bha kiba kynthup ia ki jingeh kiba ka jaidbynriew Khasi Pnar ki ia kynduh. La iakren ruh halor ki mat jingdawa jong ka seng kiba dang sahteng haduh kine ki sngi.
Ka seng ka sngewdonkam ban iai bud dien bad dawa na ka sorkar ban pynioh noh ia ka College sorkar hapoh East Jaintia Hills District, ha ka jingshisha ka seng kala dawa naduh u snem 2015 hynrei haduh mynta kane ka jingdawa kam pat urlong satia, nalor shibun kiwei pat ki jingdawa ba kongsan.
Na ka liang jong u Leningstar Rymbai uba dei u President rangbah jong ka JSM ula kren halor ka jinglong jingman jong ka ri bad ka jaitbybriew, namar ka jingtlot palat jong ki nongmihkhmat kiba don hapoh ka District Council bad ruh hapoh Assembly. U la ong ba ia ka kam khaïi pateng hapoh ka jylla la bat mynta ym shuh da ki bar jylla, hynrei ki khun ka bri u Hynniewtrep kila la kylla bar jylla pynban da kaba ki long kum kita ki Benami bad kita ki High Level ha barieh barieh. Kumta kum ki nongialam bad ka seng JSM hi baroh kawei kan dang peit ngor bha halor kine kiei kiei baroh bad kan sa pyni da ki kam ha kine ki por ban sawan.
La pyniaid ia ka jingialang da u Vice President, JSM Seng Kmie u Skhembhalang Dkhar. Ha kane ka Dorbar bah ka JSM la wan ban ia shim bynta da ki dkhot na ki Unit bad ki Circle bapher bapher kiba don ha ri Lum Jaiñtia.
