-Da ka buit sumar khyllung ba thymmai wanrah ka sorkar jylla ha Ganesh Das-
U Myntri Rangbah ka jylla, Conrad Sangma hynne ka sngi ka 14 tarik Nailar u la plie paidbah ia ka jaka sumar khyllung ba thymmai kaba kynthup ia ka SNCU, NICU & MNCU kaba don ha Ganesh Das Government Maternal & Child Health Hospital, Shillong.
Ha katei ka sngi kaba kyrpang la wan ban iadon ryngkat da ka Myntri ba khmih ia ka koit, ka Kong Ampareen Lyngdoh, u Principal Secretary, Health & Family Welfare, Sampath Kumar, Commissioner & Secretary, Health, Dr Joram Beda bad kiwei kiwei.
Ha ka jingai jingkren na ka liang u Myntri Rangbah u la ong ba ka sorkar jylla ka dang iakhun mynta ban pynbha ha baroh ki jaka ai jingsumar kynthup ruh ia ki jingtei ba thymmai bad ki tiar ba thymmai. U la iathuh ruh ba 9 percent na ka bhah bad jinglut jong ka sorkar, la theh sha ki jaka sumar da kaba pyntikna ruh ba ka Sorkar kan ïai kyrshan ia ka Ganesh Das hospital ha baroh ki liang.
U la pynpaw ruh ka jingsngewsarong na ka bynta ka jingdon 2 tylli ki medical College ha ka jylla “nga kyrmen ba ha une u snem ban wan, lyngba ka jingdon kine ki 2 tylli ki shlem hikai, ka bynta jingkoit jingkhiah ha ka jylla kan iai kiew”.
Kane kadei ruh ka hospital Sorkar ba nyngkong ha ka jylla ban don ka SNCU, NICU & MNCU.
