Kyntu u ma Andrew ia ki nongrep ka District ban trei da ka jingsngew sarong bad ka jingkmen mynsiem

Ka ophis District Horticulture Officer, West Jaiñtia Hills, Jowai mynta ka sngi kala pynlong ïa ka ‘Horticulture Exhibition 2021-2022’ ha Chutwakhu Indoor Sports Hall Cum Auditorium, Jowai ha kaba u MDC ka JHADC u ma Awhai Andrew Shullai ula long kum u kongsan.
Kane ka ïew pyninam ka dei kaba la pynlong hapoh ka skhim MIDC. Ki nongrep na kylleng ki bynta jong ka District kila wan rah ia ki mar rep jong ki kum ki jhur, ki syntiew, ki soh ki pai, ki sboh rep, ka um ngap bad kiwei de kiba la pynmih da ki nongrep shimet bad da ki kynhun Society.
Ha kane ka sngi la pynlong ïa ka jingïalang ba la pynïaid da u ma Mebanphikir Kharbuli, Farm Manager (KVK), la ïoh ka jingkren pdiang sngewbha da ka kong R.K Blah District Horticulture Officer WJHD ha ka jingdonlang ki ophisar na ka tnad ka rep ka riang bad kiwei de kiba la shah khot sngewbha.
U ma Andrew ha ba kren kum u kongsan ula ai ka jingïaroh ïa ka ophis jong ka tnad jong ka rep ka riang kaba la shim ïa kane ka bynta ban ai lad ïa ki nongrep ka District ba kin pynpaw pyrthei ïa ki mar rep jong ki. Ula pynshlur ïa ki nongrep ka thaiñ ba kin trei ïa kane ka kam da ka mynsiem sngewsarong bad dap da ka jingkmen ka mynsiem. U kyrmen ba da ka jingïatrei lang hapdeng ka sorkar lyngba ka tnad ka rep ka riang bad ki nongrep ka District yn lah ban pynbha ïa ka rukom rep katkum ka juk stad ba mynta.
Kiwei de kiba ai jingkren ki kynthup ïa u Dr. D.I. Kjam District A.H & Veterinary Officer WJHD, ma D. Lyngdoh Horticulture Development Officer WJHD, ma D. Pyrbot District Agriculture Officer WJHD kiba la pynpaw ka jingsngewkmen ban pynlong ïa kum kane ka Exhibition na ka bynta ki nongrep,
Ia ki kyntien ai khublei la ïoh na u R. D. J. Phylliew Assistant Director of Horticulture (Mkt), WJHD, hadien kane ka prokram la don ruh ka jingai jinghikai kumno ban rep tit ba la ai jingbatai da ka kong R.W Rangad Horticulture Development Officer (Laskeiñ) bad la don ruh ka jingsam khusnam sha ki nongrep.