U Bah P.S. Lyngdoh uba dei ruh u Secretary Seng Samla Hima Langrin, u Bah B.Lyngdoh Langrin ryngkat bad ki para nongïalam ki la mih shakhmat ban pynrem ia ka jingleh sop sop bad ka jingkhwan myntoi jong u Acting Syiem ka Hima Langrin, u Bah B.Syiemiong da kaba pynkheiñ noh ia ka kular hashwa ban shah jied kum u acting syiem.
Ka Hima Langrin ka hap hapoh ka District South West Khasi Hills District bad bun tylli ki shnong kiba heh ki don hapoh u pud u sam jong kane ka hima kynthup ia ka Shnong Wahkaji, Phlangdiloin, Ranikor, Borsohra bad kiwei kiwei. Kane ka hima kadei kawei na ki hima Khasi kaba riewspah bha na u marpoh khyndew, kynthup ia u Dewiong Mawshun, kynthup ruh ki mawria, mawleiñ bad kiwei kiwei. Kadei ruh ka jaka kaba iasam ia u pud bad ka Ri Bangladesh. Na kane ka hima la pynmih ruh shibun ki soh ki pai bad ki jhur ki khur hynrei mynta kane ka hima ka don hapdeng ka kynrum kynram naduh ka por jong u syiem G.Syiemlieh.
Hadien ba khyllem ka jingsynshar jong u syiem Nangtei Syiemiong, ka hima da ka jingshaniah ka la aiti ha u Acting Syiem B Syiemiong ban shimti bad khmih lynti ia ka jingsynshar hok bad ban ia iaid lang katkum ka jingangnud hapoh u jylli jong u paidbah hynrei namar ba kren briew ka pisa, une u nongialam u la leit pyndem noh ialam sha ka miej treikam lane ka managing board da ka thong ban ioh iasam arliang ia ka 4 klur 30 lak kaba la ioh na ki BSF na ka bynta ka jingker sainar ia ki jaka khappud.